立即捐款

政經

為馮檢基平反

為馮檢基平反
廣告

廣告

我份人好抵死,當個個都鬧馮檢基,我一定唔跟大隊,掉轉槍頭強詞奪理幫佢拖。

對於今次參加九西補選,畀人鬧佢專登鎅票益陳凱欣,馮檢基咁樣對記者講:「 冇鎅票㗎呢個世界,只係你自己唔夠票……」

點知畀人抽後腳,搵番2015年區議會選舉,佢嘅前親密戰友黃仲棋出嚟攪局,馮檢基嬲到爆對記者發牢騷:「黃仲棋目的只係鎅我票,想我輸」,最後馮檢基真係以99票輸咗畀工聯會小花陳穎欣。

啲人質問阿基,咁到底呢個世界有鎅票定冇鎅票?

即係咁,《孟子》都有話,「彼一時,此一時也」。
依家係依家,舊屎係舊屎,成日講舊屎,世界點會有進步?

2015年金庸又未死鍾士元又未死高錕又未死梁振英又未死…… 點可以同2018年比較?

好似老毛當年都曾經稱呼蔣介石做【介公委員長】,後來改口叫佢做【蔣匪】, 邊個夠膽提返舊屎?

當然,老蔣亦都叫番老毛做【毛匪】,呢鋪打和,Super! (可能佢哋以為個「匪」字等於英文Mister,所以大家如果想叫 Mr C Y Leung,可以簡稱為梁匪……)

仲有,佢第一次輸畀陳穎欣、第二次輸畀陳凱欣,其實就係陳字同馮字五行相剋,姓陳嘅永遠都食住姓馮嘅,如果唔係我哋就唔會叫陳馮富珍、陳馮富珍…… 冇人會叫馮陳富珍,係咪?

至於點解兩次都輸畀陳乜欣,我諗咗好耐都未明,尋晚半夜起身去廁所終於靈光一閃,原來有根有據( 想知答案?照規矩pm畀我,連同近照履歷年齡性別,我會私下回覆)。

廣告