立即捐款

國際

Dial R for recession :美國衰退,閣下點算好?

Dial R for recession :美國衰退,閣下點算好?
廣告

廣告

環球股市繼續受壓(唔好幾百點又話股災啦),美股大跌(寫時美股未收市),原因又係各有各講(股市從來唔話你知做乜跌)。但你話係因為貿易戰或中美關係?最多解釋到點解中港股市大跌,但冇理由美國都跌,仲好似多過中港。

比較合理嘅解釋,你見呢幾日多人講債息倒掛,inverted yield curve,長債債息平過短債。即係借五年錢畀美國政府,息口低過借兩年。又如何?關我乜事?因為呢個現象好多時都預示到經濟衰退,命中率極高,百發百中(甚至係百發百一中,即係有時會誤鳴)。點解會咁準?有機會再解。總之你明白而家啲人開始驚美國衰退就得。

咁最新嘅就業報告,又令呢個擔心更加變大(原諒我嘅中文)。嚟緊應該你都係聽到壞消息多過好消息。

就業報告又真係唔太好,非農職位增長十五萬幾,市場預期廿萬,爭好遠喎。之前嗰個月嘅數亦都向下調。薪金增長亦都比預期差。一句講完就係:而家呢刻都仲幾好,但幾肯定見頂了。

經濟數據任你演繹(但明顯係低過預期),而一個月幾個數據亦不代表全幅圖畫。但你睇金融市場嘅反應就好明顯:美股係咁跌,唔係一日,呢排都係咁。美國債息亦都係咁跌,即係投資者買債券,點睇都係避險。

仲有加息預期(有得在期貨市場度賭的,唔係只係訪問幾條友咁化學),亦都急跌。十二月加息機會賠率仲係過半,但而家睇賠率下年可能只加一次。(當然賠率幾時都可以變,一日變晒都得,我估就唔止一次嘅—但我都可以隨時變)。

越嚟越多蹟象顯示美國經濟快衰退,未來幾個月只會越嚟越多人講。唔使講「中國經濟仲差」,呢個根本無關。經濟有周期,有起落,林振強(係林振強,唔係林奮強)話齋,期望經濟不停向好唔會衰退,就好似期望陽具不停勃起唔會軟咁,一定係有病。美國作為無可質疑嘅政經軍事科技龍頭,美國打個尿震,全球就大地震。

但,衰退咪衰退,有乜咁大不了?活咗四十年,我都身處過N次衰退,你都係。87股災我仲細,唔算。但由我開始懂金融(識少少都係懂啦)開始,亞洲金融風暴,科網爆破,雷曼爆煲,三單都真係稱得上災難,唔係話而家跌一千幾百點啲友又話股災。但,太陽照常升起。如果你睇夠老嘅人(例如已故嘅德國股神科斯托蘭尼)講,佢地甚至經歷過兩次大戰,美蘇冷戰等等,但股市依然不死,創新高。

唔衰退,邊有平貨買?(有時衰退都冇平貨你買添)。每次災難都係機會 — 有錢人嘅機會。每次資產價格大調整都係一次洗牌 — 有錢嘅人更有錢。好顯淺嘅道理。

畢菲特講別人恐懼時我貪婪。但現實一定係:別人恐懼時我冇錢(本人金句一)。我最鍾意聽大陸官報講:市場從來不缺錢,只缺信心。因為我相反:我從來不決信心,只缺錢。

面對衰退,你要做嘅嘢好簡單:保住你份工,唔好返工睇文,唔好上網講老細是非。孝順你父母(特別係有樓而供完嘅),去多啲老人院探阿爺阿麻(特別係未立遺囑既),減省你啲不必要開支,去少啲日本,改為去澳門,或者去大澳門。食多啲蔬菜,做多啲運動。玩膠?都唔係。Time is your friend,鬥長命係個方法,所以投資者夠長命好重要。其他方面都係。馬哈蒂爾如果日日食肥豬肉(回教徒嚟的,當然唔會食)邊得嚟九十幾歲仲咁堅,仲可以返嚟清理門戶拉佢不肖徒弟落台?

當然有危有機,十二月聯儲局加息應該都冇走雞,下年都仲會加,爭在幾多次。但肯定嘅係市場要調整返對成個加息路線嘅估計。之前我成日講8/13 (聯儲局嘅base case),總共加13次。 由2015開始,1+1+3+4+3+1=13。計埋今年十二月呢次,就已經1+1+3+4=9.下年加唔加到三次都好成問題。

而觀乎上次香港銀行都只係加八份一厘,跟唔足美國,呢兩個月銀行體系啲結餘又唔見有大跌。照計嚟緊十二月呢次,最多都係跟美國加(甚至有人話唔跟足),追加嘅可能性極低。即係供樓息口照計好快到頂,

話分兩頭,樓市唔係只受利息影響,我甚至認為利息水平嘅影響相當細(你睇下過去三年?)。但停加息也不代表樓價唔跌。不過幾肯定嘅係,最初有人估咩供樓壓力大升嘅,應該唔會點出現。跌還跌,負資產還負資產(有幾出奇?之前咩呼吸plan呀問發展商借首期嘅,必定負資產),但供就供得起嘅。

當然,仲有一切有關息口嘅東西,公用股呀,REITS呀,車位呀,定期存款呀,又全部再計數了。

不日會再寫多篇,講近日最多人講嘅債息倒掛, inverted yield curve.Stay tuned.

原文刊在作者 Medium
作者 Facebook Page

廣告