題為編輯所擬。
梁文道寄順豐單野，令我覺得香港正在迅速犬儒化，快與大陸睇齊。
我自己做書店，台灣發行商有時有貨版或急件，係會用速遞來香港，有時亦係用順豐。我地書店自然有唔少書係講中國、民主、政府呢d話題。但直至過去半年，未試過寄書受阻。所以有人走出來話梁文道出世、離地，我都覺得好奇怪。因為呢件事，令我呢個日常用家都好錯愕，亦收到台灣發行商方面的查詢，問係咪會寄唔到。我只能話，台灣寄書到香港要審查，對我地來講係個新消息。
但真正令我覺得奇怪同擔心的係，原來指出極權的打壓、審查，可以被非議、被罵離地。縱使你點戴頭盔，我都覺得呢種指責係逐漸走向馴服與犬儒。我地成日話，對住不義、打壓，唔好慣，要有感覺。而所謂離地的指責，其實就係笑人反應大。
即係我一早知中共仆街，香港政府仆街，所以我應該唔使鬧，唔使比反應？有反應，覺得唔妥，原來係我有問題？咁以後見到梁振英講尻野去鬧，係咪又變成離地？見到林鄭、羅致光明烚香港人，我走去鬧，又係我反應過大，想做KOL搏宣傳？
呢種「中共有幾仆街我一早知」的態度，導致「你走去鬧就係你入世未深／天真」的結論，但最可怕係變成「所有人再鬧都係浪費時間或搏宣傳」。一個社會馴服於極權，覺得極權就係日常，正正係由此而來。