立即捐款

社運

與林卓廷商榷︰政府的新賠償方案根本就係呃人

與林卓廷商榷︰政府的新賠償方案根本就係呃人
廣告

廣告

林卓廷想支持政府,咪支持囉。

民主黨對新界東北的立場,亦早就預期會軟化,梁振英花了大量社會資源去打造的「土地供應短缺論」,消減了社會運動的壓力,係為佢地軟化做好了下台階。

但林剛剛發表的〈民主黨就新界東北第一期撥款立場的聲明〉,就有極大的誤導成份。

難免要稍作澄清,以正視聽。

1 有關林議員聲明的1A部分,政府所聲稱的「房協安置」的安排,基本上係徙氣的,純粹係好過冇。

因為百和路或古洞的專用房協屋邨,至少對前期和第一期的受影響住戶而言,肯定係趕唔切清拆前起好。

即係住戶即使想去專用房協屋邨,都要先去暫住單位(公屋或非指定的房協),去左暫住單位,仲會搬咩?但暫住期一過,就不可「免審查」,要面對經濟審查及富戶政策,即係可能要焗住又搬多次,去番專用房協單位,所以成件事係相當煩和擾民。(從設計去看,係引誘逼遷戶去購買房協單位)

如果政府的安置係免審查公屋,就能避免一部分呢啲問題。林生咁都收貨?

2 有關林議員聲明的1B部分,林議員似乎認為,「為合資格住戶放寬現金特惠津貼資格及加大津貼額」,是改善了原來的補償。

呢個所謂 plan(今年7月在財委會通過,民主黨在席全投贊成),完全係欺騙性的,根本就少左錢。政府自己都話,如果有人按照新 plan 賠少左錢,咁用番舊 plan 照計。

首先,政府話將普通賠償與特惠特設賠償劃一。但其實,近年菜園村和兩大新發展區(洪水橋和東北),都係用特惠特設,而不是普通。所以劃一其實即係低左。

其次,政府聲稱最高賠償增至120萬(特惠特設賠償最高係60萬)。但其實相對特惠特設,係加入左面積系數,你間屋滿一千呎,才會可能拎足120萬,但普遍寮屋係三四百呎左右,即係四五十萬,咁比起本來唔考慮面積、只考慮居住年期的60萬特惠特設賠償,其實係少左。

It's just a blantant cheat。林議員不去指出,仲要陪政府一齊講大話?

3. 有關林議員聲明的第2點,民主黨會密切跟進石仔嶺老人院的安置事宜。

其實正如張超雄議員話齋,當年時任發展局局長陳茂波,係特登打電話俾佢,話一定做到老人院新舊無縫交接,來遊說張超雄支持。

而家新聞已出,證實左新老人院建成,一定會比舊老人院清拆遲幾年。即係,數已走。

咁都唔反對?密切跟進?同建制派有咩分別。

4. 有關林議員聲明的第3點,pressing housing need,所以就要贊成目前的新界東北計劃。

你遮住個名,我仲以為呢堆對白係梁振英講的。

係人都知,政府係玩緊一套刻意對立「有住屋需要的基層巿民」和「被逼遷村民」的賤格語言。

亦係人都知,明明即時有大把地,可以做過渡性房屋。又例如粉嶺高球場根本唔駛收地,一唔續約佢就玩完啦。

甚至,在新界東北發展區範圍內,預留做創科的土地,根本就未有實質用途。

預留俾發展商透過換地來興建私人樓宇的,當中有相當部分已經冇人住,換地談判亦超慢,4年來只係傾左兩單。中止換地,改為徵收現在已冇人居住的發展商土地(如「鬼屋」)去興建公屋,咁咪可以減少逼遷囉。

林議員咁積極推銷政府邏輯,咁點解唔企過對面呢?

5. 土盟有朋友指出2012年民主黨反對新界東北的立場,話佢地出爾反爾。

林議員就強調「民主黨從來冇話不遷不拆」,含冤莫白。

事實上,今天反對目前政府東北規劃的議員,亦冇話「不遷不拆」,只係要求善用高球場,減少逼遷,合理安置,唔好出口術。所以,其實係林議員將反對政府的議員打造成「原教旨式反發展」就真。

6. 以上已冇講農戶安置幾咁離譜,青苗賠償制度幾多問題,動物安置政策更完全欠奉。

結論︰支持政府真係唔緊要,阿公會記住你,選民會記住你,退黨的反對東北前黨友會記住你,everything fair and square。

但唔好做政府方案推銷員,誤導巿民,大話講一百次(「放寬現金特惠津貼資格及加大津貼額」),仍然係大話。

廣告