立即捐款

政經

明星拍片同醫護打氣,真係多謝晒

明星拍片同醫護打氣,真係多謝晒
廣告

廣告

醫護壓力爆晒煲,連護士都忍唔住出嚟遊行,然後醫管局正式宣布:我哋已經搵咗啲明星拍片同你哋打氣喇,好開心呀。

嘩,真係多謝晒呀。

嘩,我真係不能想像,今日嘅政府上上下下,點解可以弱智到一個咁低嘅點呀。

你今時今日搵到啲咩明星呀?得罪講句,今日娛樂圈還有幾多人可以稱得上「明星」?偽人就有好多,而好多人已經因為形象問題唔揀得,唔通搵陳小春同梁勁廢(前名梁烈唯)嚟同醫護人員敬軍禮咩?一旦搵錯咗,打氣變做戲,做戲變嬉戲,剩返一肚氣。

咁睇吓個名單:譚詠麟、陳慧琳、楊千嬅、謝雪心、C All Star成員On仔和球星葉鴻輝……,呢啲明星賣吓商品廣告冇問題,但為啲弱勢打氣?為啲做到有時間死冇時間病嘅人打氣?即係我一邊做到死賺雞碎咁多,然後你搵班日日過住奢華生活上晒岸嘅有錢明星(最多撇開On仔同葉鴻輝啦)走嚟同我講:「你哋努力呀,我哋撐你呀,加油呀,香港人靠你哋啦。」呢個效果,同攞幾十萬個月嘅「老人」林鄭同啲六十歲嘅香港人講「我都六十歲,好辛苦做緊嘢,大家要努力呀」真係有異曲同工之妙——一樣令人爆晒粗。

坦白講,除咗葉鴻輝,名單上其他嘅人,有邊個有咁強嘅道德犧牲精神和魅力,可以令犧牲咁大嘅前線醫護人員覺得好開心好舒服,然後甘願繼續做到死?我亦好相信,呢班人絕大部分甚至全部係唔會幫襯公立醫院嘅。

再講吖,搵呢啲咁嘅明星打吓戲,真係有Q用咩。我係醫護,我寧願見到市民真誠為我打氣,好過搵一班接ORDER當JOB做嘅偽人係鏡頭面前矯揉造作,見到真都係想嘔。(你夠膽搵埋成龍嚟吖)

大家好似唔記得咗,當年九龍灣迷你倉大火,一班偽人又出嚟話要幫消防員打氣,點知畀人剷到PK,無效果仲腐皮爆燈。你估今日仲係幾十年前咩,呢啲橋仲work㗎咩?難得人類係要重複錯誤,仲要咁快就重複一次。

依家香港真係可悲到,社會上仍有很多有心有專業嘅人,一直緊守崗位,守住專業精神這種香港所餘無幾嘅優勢,然後我哋有一班尸位素餐兼智障但最叻奉迎主子嘅奴才去管治。更可悲嘅係,好多香港人覺得冇乜嘢!

後補多句:據知搵楊千嬅係因為佢做過護士。我知,1997年前嘛。搵個在前朝庇護下做護士嘅,來為今日在特區政府管治下水深火熱嘅護士打氣,我覺得仲諷刺囉。

題為編輯所擬

廣告