3年前有拉舒福特贏波後唔去慶祝，因為佢要趕住溫書應付第二日學校嘅化學考試；
3年後亦有17歲新仔格連活特（Greenwood）喺歐聯淘汰PSG之後冇去慶祝，因為佢要趕返去曼徹斯特上堂；
同學：「前日冇返學嘅？」
活特：「係啊，去咗踢波，喺歐聯淘汰咗PSG，入咗八強。」
值得一提，格連活特同拉舒福特同樣就讀一間同曼聯有合作嘅中學－Ashton-on-Mersey School。曼聯會送唔少青年軍入去讀書，由讀書到踢波都係一條龍服務，就算將來做唔到職業足球員都可以銜接大學讀其他同體育／運動相關嘅課程。
佢哋基本上同一般中學生係冇乜分別，一樣要溫書，一樣要考試，一樣會喺學校溝女，唯一唔同就係啲阿sir會預計某啲學生有機會要走堂踢歐聯。過去唔少曼聯球員都係呢間學校嘅校友，例如普巴、韋碧克、伊雲斯、連加特、贊奴沙、碧基等等。