題為編輯所擬。
點解 #火車未到站 ？因為馬鐵延伸至九龍後，乘客分分鐘少咗車揀，甚至要捱貴車費
當大家關心紅磡站新建月台係咪需要「砍掉重練」，另一邊廂大圍至何文田段嘅準備工作進行得如火如荼。據了解鐵路公司計劃將馬鞍山綫，於今年年中及年底分階段延伸至鑽石山及何文田。紅磡站施工質素問題當然要關注，但千萬唔好因此而忽視馬鐵延伸出九龍後所引申嘅議題：巴士路線重組及車費安排。有啲地區分分鐘少咗車揀嘅同時，車費仲要貴咗。
新鐵路縮短行程 車費預佢唔會減
參考鐵路公司「鐵路行程指南」，現時來往大圍及鑽石山行車時間為17分鐘，新建路段通車後將縮減至5分鐘（資料來源： 沙田至中環綫 - 項目資料 - 車程所需時間）。轉車安排方面，鑽石山站新建部分位於觀塘綫部分之南面，兩個大堂嘅收費區以一條寬闊、筆直嘅轉乘通道連接。
東鐵乘客前往九龍東，若選擇到大圍、鑽石山轉車，轉車次數雖然比去九龍塘轉多1次車，但搭少兩個站，轉乘路程縮短，可以縮短約5分鐘車程；馬鞍山及城河東乘客能夠經新建路段直達鑽石山，響轉少次車嘅情況下更可節省近10分鐘車程。
以來往沙田及觀塘為例，現時經鐵路來往沙田站及觀塘站需時28分鐘；至於來往第一城站及觀塘站則需時34分鐘。考慮經大圍及鑽石山之轉乘路程，推算來往沙田站及觀塘站時間可縮減6分鐘至22分鐘，至於來往第一城站及觀塘站時間更可縮短11分鐘至23分鐘。
縱觀兩鐵合併後新路線定價安排（舊文重溫），現有車站間之車費並唔會因為新鐵路通車而作出任何調整，當中又以九龍南線通車後嘅西鐵最為明顯。由此推斷，即使馬鞍山綫延伸至九龍，能夠將新界東及九龍東鐵路行程里數及時間縮短，車費並唔會因而調低。
新鐵路之巴士路線重組 唔關事地區同樣受影響
新鐵路線通車後，同時係「配合新路線通車的公共交通服務重組計劃」實施之時。鐵路服務範圍延伸，部份與新建路段重疊嘅巴士路線服務因而改道、削減班次或取消。不過從過往針對西港島綫、觀塘綫延綫及南港島綫嘅巴士路線重組計劃建議可見，部份偏離新車站嘅地區、或與新通車路段並無重疊嘅巴士路線卻被牽連。西港島綫通車，當時尚未有鐵路服務嘅南區有唔少路線被減班甚至取消；觀塘綫延綫通車，途經九龍城、土瓜灣巴士路線減班；南港島綫（東段）通車，鐵路未能覆蓋嘅香港仔、華富華貴一帶則再次受巴士路線重組影響。
有呢啲前車之鑑，可以預計到即使「屯馬綫」未能全綫通車，但唔少睇落無關痛癢嘅巴士服務將慘受牽連。直接受惠於新路線嘅沙田區、黃大仙區同九龍城區，區內巴士服務變天會係意料中事。至於新鐵路線未有途經嘅觀塘區，極有可能因新鐵路通車後嘅巴士路線重組計劃而削減巴士服務。慈雲山、新蒲崗、四順、藍田半山、土瓜灣道、愛民邨等偏離鐵路站地區，亦有機會響屯馬綫相關巴士路線重組下，被削減巴士服務。（另見：【區區有理講】勿以沙中綫取代其他交通工具）
香港運輸政策乃「以鐵路為骨幹」，巴士服務削減，變相「鼓勵」市民改用鐵路服務。然而，鐵路車費一般比路面交通為高，假若鐵路路程縮短卻未有相應調低車費，乘客「被迫」搭貴車。
選擇少咗，車費貴咗，大家都輸，係時候改變啦！向盲目巴士路線重組說不，向物非所值鐵路車費說不！