區議會交委後，下一站係同元朗食環署開會，了解星期一係區議會上通過嘅新垃圾站方案細節，同埋反映社區衛生問題，包括發現蛇、老鼠雨季前防蚊工作。
關於新垃圾站，我係會議上追問新垃圾站嘅設計改動空間、「回收中心」營運方式、地區諮詢可行性。不過，食環都重申唔想再做諮詢，而且空間改動亦話唔到事，因為係屬於規劃署嘅權責。關於「回收中心」，我指出「中心」可以回收嘅種類，其實而家屋邨已經有提供，紙、膠、金、玻璃甚至電器都已經係邨內實行，洪水橋街坊都可以嚟洪福處理，咁點解政府會有信心「中心」可以吸引到居民使用？食環署都答唔到，因為係環保署負責。
至於可唔可以起多幾層加入其他社區用途，食環署就話問規劃署啦，地積比係得4就係咁多。
基本上，今日會上所知嘅，同星期一係區議會上分別不大，只係了解多少少目前食環署嘅限制，其中較重要嘅限制係，整個空間要優先處理垃圾收集功能，所以任何改動都要先考慮垃圾收集程序所需要嘅空間使用。
會後，食環署帶我哋去視察啟用只有三年嘅屏信街垃圾站，洪元路垃圾站大概會以差不多嘅設計同運作方法。當年規劃屏信街垃圾站時，附近富來花園居民強烈反對，情況同洪福有相似之處。今日冇機會訪問富來花園居民，之後我都會想想辦法訪問，了解三年內對垃圾站嘅睇法，相信對跟進新垃圾站都有幫助。
講到尾，居民有權知道政府規劃，特別係新垃圾站方案加入新原素，而且具爭議性。我仍然思考緊點樣可以係網上之外收集到大家嘅想法，甚至形成平台、活動，同各位一齊介入社區設計。
有想法後，當然會同大家分享。