尋日我哋揭露咗深圳前海展示廳內嘅「粵港澳大灣區交通運輸系統圖」暗藏玄機，就係未來仲諗住再起另一條「高鐵支線」、由深圳前海直插東大嶼人工島，消息一出震驚香港人，並且引來不少媒體報導，連前海管理局都要急不及待出來回應。
今日前海管理局香港事務首席聯絡官洪為民就透過大公報同文匯報回應，表示確係想建高鐵接駁香港東大嶼，並指依件事係「前海方面希望與香港互聯互通的想法之一」，仲話「如果未來前海聯通東大嶼，方便香港居民到前海通勤工作」係值得研究探討。
當個政府成日講到起東大嶼人工島係為大家好、為大家有屋住，唔起就對唔住劏房戶咁，原來都係為咗同大陸「打通門戶」，方便跨境聯通。咁話响東大嶼要起嘅26萬間屋、商業樓面嚴重供過於求* 嘅第三個核心商業區，到底係為滿足香港需求，定係迎合大陸？不斷壓逼香港人生活空間同質素、隨時耗用萬億公帑，只為配合國策來「造大個餅」，咁造多幾多個人工島都唔夠啦？
參考：
* 據規劃署《香港2030+》研究，核心商業區的甲級寫字樓面面積長遠只有106萬平方米短缺，但政府計劃於1000公頃東大嶼人工島提供400萬平方米商業樓面面積，嚴重供過於求下仍假設商業賣地價高企，被質疑自相矛盾。