昨日的發展事務委員會會議，發展局開始時除介紹中部水域人工島，亦有介紹大嶼山保育基金，奇就奇在PPT上的相，竟然用上荔枝窩農樂節的海報、塱原的航拍相來講解呢個項目，荔枝窩、塱原位處新界東北，跟大嶼山距離相差極遠，荔枝窩塱原完全跟大嶼山拉不上關係呀。
發展局在立法會文件、PPT唔解釋清楚，一個唔該（都無）就用來講解大嶼山保育基金，觀感上好似用荔枝窩、塱原保育工作「過橋」，真係說不過去。
我地嘗試幫發展局諗埋解釋﹕其實用上荔枝窩、塱原項目的相片，目的旨在講解保育基金會參照荔枝窩、塱原保育項目的模式，與非政府機構、社區及土地業權人合作……
發展局為實踐自己制訂的《可持續大嶼藍圖》，2018年4月時已根據環境及自然保育基金，批出9個與南大嶼自然保育有關的環保教育和社區參與項目，總金額約900萬元，項目性質其實幾相似，發展局做PPT時，係咪至少都應該諗清楚，引用番大嶼山保育項目較為恰當？
唔好怪我地小事化大，一個PPT的處理，其實已經睇到政府對大嶼山的保育，到底有幾多承擔。