今期推介：Pete Buttigieg。佢份履歷，好到你唔信。
回憶二零一六大選當日，我在電視台直播室見證當撈侵當選，並且開始懷疑人生。但，上天拿走，上天給予。今屆大選，有不少相當有趣的總統參選人，值得你對世界重燃希望。從今日起我會寫一個系列介紹一些美國總統參選人，讓你不用因為當撈侵而覺得美國冇得救，相信人性仍有未來。
問：民主黨要贏，一定要贏返中西部，要令那班投了當撈侵一票的人回心轉意。
答：Pete就是來自中西部。他是 South Bend, Indiana 的市長。South Bend 曾被評為「美國十大最頹廢城市」，後工業化城市敗壞的表表者。不過，在他任職市長期間，South Bend 被完全扭轉過來，成為新興產業城市，市中心生機再現。成個民主黨，佢可能最有資格話自己可以救中西部。
問：新一代最憎老海鮮，民主黨要提名新人。
答：冇人新得過Pete。佢今年先得37歲，本身就係新一代，唔洗去扮後生討好新一代。如果佢當選，會係美國史上最後生的總統。但後生不代表冇經驗，佢做了八年市長（係呀，佢當選市長的時候得29歲，死未），實際行政管理經驗仲多過好多做幾十年議員的參選人。佢又參過軍，打過阿富汗，如果當選的話會係老布殊以來軍旅經驗最豐富的總統。佢仲話，溫室效應就係要佢呢一代人承受，所以年齡係佢的優勢至真。
問：民主黨上屆推唔到女人做總統，今屆要再試一次創造歷史。
答：如果Pete當選，佢會係美國第一個公開同性戀的總統。他之前是在競選市長連任的時候出櫃的，結果以超過八成選票當選。奧巴馬年代同性婚姻合法化，佢先有得正式結婚。
問：喂，有冇搞錯，佢份履歷夢幻到真係fit晒今屆選舉的每個要求喎……
答：我都未講完。佢仲識講八種語言（英文、法文、西班牙文、意大利文、馬爾他文、挪威文、阿拉伯文，同埋阿富汗波斯語），早前用挪威文回答挪威電視台訪問，大家問佢點解會識挪威文，佢話因為佢鍾意睇挪威小說，所以自學，死未。又，佢係一位演奏級鋼琴家，屋企收養兩隻流浪狗。
問：佢真係冇弱點？
答：有，外交經驗不足。不過咁，就算做國會議員坐外交委員會，都唔見得外交經驗會好得去邊。過去亦有好多州長做總統，之前都冇乜外交經驗，佢起碼當過軍。之前最有外交經驗的候選人咪希拉利囉，佢輸左。
問：其實佢個名點讀？
答：BUL-dah-jer，咁上下。係好難讀，呢個可能先係最大弱點。