立即捐款
ads

國際

正常人都鍾意孫悟空

正常人都鍾意孫悟空
廣告

廣告

特朗普又失驚無神嚇你一驚——中國諗住貿易談判好快搞掂,點知特朗普突然話周五起2,000億美元中國貨關稅會由10%提高至25%。嘩,真係應棍。

本人初時都對特朗普呢個「狂人」半信半疑,唔知佢會唔會真係傻,但越來越明朗嘅係,佢傻唔傻已唔關我事,睇佢打妖精棍棍扑落去,就梗係越睇越喜歡。

好多人唔鍾意特朗普,咁係架喎,花弗、玩女人、牙擦擦、精英主義、樣衰衰、政治唔正確、亂出牌……,衛道之士一定唔喜歡,以中華文化咁鍾意事事泛道德主義嘅角度睇,一定睇佢唔順眼——把口咁講。咁不如攞本《西遊記》出嚟睇吓……

唐僧呢,簡直係「左膠」嘅原祖。佢見到悟空打白骨精,好唔忍心,仲趕走埋去,真係悲天憫人,真係大慈大聖,真係道德高尚,但事實係唐僧太廢,睇唔穿妖精嘅偽裝,如果冇孫悟空返嚟救駕,結果咪就係畀妖精食到連骨都冇,仲連累埋兩個廢廢哋嘅徒弟!

咁大鬧天宮嘅特朗普,當然就係孫悟空。特朗普本來就係商界巨賈,好似孫悟空咁有個花果山做大王,依家被推舉出嚟替天行道。佢一對金晴火眼看實,知道妖精又識扮弱者又識扮蜘蛛精,博同情博憐愛,暗裏就係想食咗你。於是佢一棍扑落去,啲「左膠」驚呼「做乜咁殘忍呀」嘅時候佢再扑多棍,於是個個唐僧上身怒不可遏,要趕走佢。最後暗裏喺度笑嘅係邊個?咪就係妖精囉。

喺呢度要界定一下「左膠」,就係覺得咩都要大愛包容政治正確,唔要好似特朗普咁對中國,要和平要教化要合作唔好動槍動棍。現成例子,就係已宣佈參選2020年美國總統大選的前副總統拜登(Joe Biden),佢喺拉票活動中指:「他們(中國或準確點說「中共政權」)不是壞人……他們不是我們的競爭對手。」嘩,聽到真係噴飯,如果中共唔係壞人,我敢好肯定話你聽呢個世界再冇壞人。

拜登、前總統奧巴馬、落敗嘅希拉利等人,本來係左翼,但越來越變左膠,無視現實咁去默許邪惡壯大。於是成班左膠係咁攻擊特朗普,甚至同情中國,想佢收手唔好打妖精,如無利益計算在內,其實咪好似唐僧咁囉。

好啦,咁最後嘅問題就係,你睇完《西遊記》,會鍾意邊個角色?係滿口仁義廢到無論嘅唐僧,定係鍾意大鬧天宮犯咗佛家嗔毒嘅鬥戰聖佛孫悟空呢?

絕大部分人,梗係鍾意孫悟空架啦。最頂唔順係嗰啲已身在妖精口中嘅黎民百姓,日日畀妖精折磨,明明見到悟空一棍扑落去,仲大叫唔好,同你講妖精都要講人權,妖精要慢慢教育為人,要畀機會妖精成長,孫悟空都唔係好人,佢只係反叛只係有利益只係想成佛博出位。孫悟空聽到一定反一反白眼,然後二話不說扑多妖精幾嘢。

咁怕唔怕特朗普法力太高失咗控?唔怕,上天已經為佢戴咗金剛箍——成熟嘅權力分立制度、深厚嘅現代文明根抵、良好嘅國民質素,一唸咒,不就制衡了嗎?

廣告