（獨媒特約報導）警方自本月17號起，封鎖理工大學外的全部道路，指理大內的人涉嫌暴動，連日來多番呼籲理大內的人「投降」。被困理大的人各出奇謀，誓要逃出生天，充滿危險的渠道成為了他們的逃生之路，獨媒記者專訪了帶隊爬渠離開的阿水（化名）。
與一眾被困理大的人一樣，阿水是抱住陪伴手足的心態，「理大要人就去，見啲人話就包抄都要死守，咪留低陪大家囉，心諗最多衝入黎咪比人拉。」不過他萬萬沒有想到除了被捕風險之外，在理大內率先面臨的是斷水斷糧、大量傷者卻沒有物資的絕望。
心情矛盾 擔心連累同行人
阿水決定帶隊爬渠離開，為什麼阿水要選擇如此冒險的方式逃生？
阿水坦言，自己有相關的經驗，對渠道有認識，才敢帶着一隊人「搏一搏」。「其實一直都有諗過行渠走，呢個諗法唔係突然彈出黎，始終地底可以避開記者同狗（警察）。」然而循渠道離開有很多要考慮的問題，包括光線、路線及渠道內的毒氣等，若不周全也是九死一生 。阿水表示作出這個決定前，他心情矛盾，他最害怕不是自己死亡，而是擔心那些信任他而跟他一起行渠的人，「帶住啲人走，唔係得我一個，有事上黎我承擔唔起咁多條命 。」
阿水克服了內心的掙扎後，決定行渠離開。「盡量想帶多啲人走，再拖嘅話，有傷或者無體力都唔洗再諗呢條路。」於是他把握時間，組織逃生隊伍，「因為我點都會試，我同佢地講咗（行渠的）風險，行唔到就折返。折返對於我黎講無難度，佢地OK就一齊。」
與計劃有落差 走岀渠道是「好彩」
阿水只能作萬全準備，降低此行的風險。他首先聯絡了一個對渠道同樣有認識的朋友，「叫佢係渠口帶埋家長車接我地，仲要帶衫、褲」。其後「睇下水道、渠口、地圖，諗咗幾條可行路線，落到去可以執生轉路」。裝備方面，阿水表示一定要戴上「粉紅色嗰隻豬咀」，最好有多個手電筒旁身，解決地下光線不足的問題。
不過最重要的是要控制時間，「儘量控制路程，30分鐘內要上番地面，咁樣會安全好多。」而阿水為了大家的安全，亦盤算好退路，「已經諗好咗，20分鐘搵唔到路就要折返，計番最長逗留時間都唔會太長，會比較安全。」
現實與計劃始終有落差，他憶述在過程中最大的危險，其實是跟隨他的人不習慣渠內環境，包括氣味與濕度，「比我想像中行嘅進度慢好多，一度諗洗唔洗折返。後尾岩岩好時間搵到出口，其實係好彩，仲有一出黎個刻都好怕比人發現咁多人爬出黎」。抵受着龐大的風險，阿水率領一行人成功逃脫。
不希望仍然被困的人嘗試行渠
雖然他們成功離開理大，但阿水其實不贊同從渠道離開的方法，「求下你地唔好隨便試，如果真係要行渠，記得記得記得（對渠）要有一定認識，或者有人有知識幫你先好試，同一定要有人接應。如果真係要行，記住折返路線，唔好係下面盪失路」。除此之外，阿水叮囑，「受左傷、有傷口千祈唔好行渠，扭親都唔好，怕感染同埋好難預個逗留時間」。（編按：警方在星期二知悉有人循渠道離開後，已加強渠口巡邏，昨早在紅磡暢運道一個渠口拘捕6人。）
阿水想對仍身處理大的手足説「係出面等你地！」
