（一）
關於「被捕手足獲發紙口罩」事件，警方已經回覆咗我新口罩規格。由4月2日起被羈留人士所獲發嘅CSI口罩，規格係三層結構，BFE>95%，PFE>95%。我今日記者會嘅主要訴求已經達到了，真係要歸功於整個公民社會，主要包括網民、傳媒、議員三方面合力向政府施壓。
（二）
今日亦係我上任區議員三個幾月以來，最有成功感嘅一日，因為我見證住整個爭取過程。向警方爭取嘢，好耐好耐好耐都冇成功過啦，今次哪怕只係一個CSI口罩，但都係一種實質嘅改變，保障到往後被捕手足嘅健康（當然，我唔希望再有手足被捕啦）。今次亦令我諗起我從政嘅信念「累積小改變，成就大改變。」唔好輕視每個微小嘅改變，當佢哋累積起來，就會成為大改變。每個微小嘅成功，都會畀力量你喺未來繼續爭取其他嘢。
（三）
由紙口罩改為CSI口罩嘅爭取過程，主要經歷咗以下嘅事情，發展得好快，亦好值得記低：
- 4月1日凌晨3點半，我喺Facebook出post講述「紙口罩」問題，獲得4,800幾個like，3,700幾個share，256個comment
- 4月1日凌晨5點半，楊岳橋議員Facebook出post講述「紙口罩」問題，獲得5,900幾個like，412個share，441個comment
問題被議員引爆，唔好睇少你自己嘅like、share、comment，就係呢一鼓鍵盤力量，成功令「紙口罩」問題迅速喺網上世界發酵。同時，傳媒亦開始報導，再喺現實世界開始向政府施壓。由「空戰」殺到「陸戰」，今次爭取成功，一定要歸功於網民同傳媒。
- 4月1日下午，我向油尖旺區議會提交文件，要求於4月14日區議會大會上討論「紙口罩」問題，內容包括動議要求警方向被捕人士提供CSI口罩
- 4月1日下午，楊岳橋議員於立法會見記者，批評被拘留人士只獲派發紙口罩和移除口罩內鐵線做法不合理，又提到「在獄人士都係用CSI，都有鐵線啦！」
議題繼續燒，開始觸及議會運作，進一步畀壓力政府
- 4月1日至2日，因為有太多人share我嘅post，令我喺網上認識咗331被捕手足家屬「A小姐」，係佢畀被捕手足用過嘅「紙口罩」我，冇呢個口罩嘅話，根本開唔成記者會；隨後我又再認識另一位331被捕手足「波仔」，再次感謝佢願意一齊開記者會。今朝記者會能夠成功開得成，真係一種奇妙嘅緣份。全靠互聯網和社交媒體，將問題極速引爆、輻射傳播，而收case、搞記招嘅過程都喺極短時間內進行。
- 4月3日（今日）早上大約11時30分，我同「波仔」、「A小姐」開完記者會。我哋展示警方發放畀331被捕手足嘅「紙口罩」，入面只有兩層物料，完全冇過濾細菌病毒嘅熔噴布中間層，一個智力正常嘅人都應該覺得有問題吧？有物證有真相，擊中警方要害。
（四）
有趣嘅係，我哋開完記者會之後，警方最初嘅回應仍然係死撐，但四個鐘頭後又改變立場。
-香港電台新聞4月3日12:35pm發佈：「基於安全理由，當被捕人士被送達警署後，警方為被捕人士提供沒有金屬鐵線的口罩。對於有區議員指，警方要求被捕人士除下外科口罩，然後提供「紙口罩」，本台向警方查詢，警方提供的口罩屬甚麼標準，警方的書面回覆沒有具體回應。
警方說，基於公共衞生考慮，警方有為所有進出警署人士包括被捕人士量度體溫。如被捕人士有明顯的傳染病徵狀，或有理由相信被捕人士患有傳染病或曾與傳染病患者接觸，該被捕人士會立即送到醫院接受治療。
-直到今日3:54pm，警察Facebook專頁出post話：「…警方於昨日（4月2日）起，向被羈留人士提供由懲教工業生產的外科口罩...過往曾經發生被羈留人士利用外科口罩內的鐵線作自殘行為，因此警方較早前曾提供一種兩層結構及沒有鐵線的口罩供被羈留人士使用...」如果我哋唔開記招鬧你，你就唔會主動講出黎？
警察公共關係科喺今日（4月3日）上午回應港台查詢嘅時候，原來唔知道早於4月2日起就已經改成CSI口罩？警察公共關係科冇掌握清楚資料，就回答港台？其實有d奇怪。
（五）
無論點都好，4月14日油尖旺區議會大會上，我都會繼續跟進呢單野。
我唔希望再有手足被捕，但如果真係有手足不幸被捕，請向警方索取CSI口罩，呢個係你嘅基本權利。被捕支援律師團如果再需要口罩，歡迎你聯絡我，我會盡力協助。
最後，再次感謝全港網民、傳媒、楊岳橋議員、A小姐、波仔聯手施壓，成功迫使警方改變立場，提供CSI口罩。喺而家呢個黑暗時代，今次成功爭取都係一種鼓舞，鼓勵我哋繼續爭取其他手足嘅權益！