立即捐款

唔係以前嘅香港才有今天的局長

唔係以前嘅香港才有今天的局長

《鬥雞成局長》
忽然細龜變大龜,應知不是好東西。
不念蒼生拜習帝,芥羽金距作鬥雞。

過多月之前這位冇乜人識嘅入境署長突然越級調升,一下子就做了角色甚為吃重的政制及內地事務局局長。消息流出當日,好多人連佢係乜嘢樣都聯想唔到。

後來資料逐漸曝光,就連佢原辦公室内的「擺設」相片都出現,大家才恍然大悟。哦!原來係咁!明!真係各有前因莫羨人。

一個地方吏治的敗壞往往就是如此!由紀律部隊出身的進佔政務職位,說明了一個文明社會要逐步向警察國家過渡,就算唔係必然如此,都已經說明了在當前形勢下那個政府的意圖。

而以擦鞋的堂而皇之及唔怕核凸程度及其他量度奴才級別的指標來決定一個人在官場有冇運行,更是一個地方封建及威權程度的最佳寫照。這一位局長在原辦公室中放滿了習主席的玉照,可以說是充分表現了他對中央最高領導人的一片日月忠貞。聶德權要讓位,想來也必然是唔到佢唔服!喂,做到咁核突,你做唔做得出先?做唔出就唔好怨啦!

到了今日,這一位新科直升機局長上電台接受訪問,表現出嚟嘅鬥性,可以說是令人耳目一新。令你點估都唔會諗到佢係做政制事務局的揸fit人。

主持人問佢怕唔怕制裁,佢作為政制事務局的主事官員,唔分析制裁嘅可能性及影響,唔講點樣去應對,但卻以發脾氣的口吻說:「我又無美國籍,又無外國資產,我咪唔去囉!加拿大?都唔去囉,費事俾人捉,你咪制裁我囉。」

就如明報專欄家明所講,他這種對答方式顯示的「那一份市井味,財大氣粗的性格,就像未見過世面的人一朝得志,真可悲。」哈,「你咪制裁我囉」 ,與日前保安局局長李家超在立法會回應議員質詢時說「你咪去投訴囉」時一樣咁目中無人,同樣是要表明「你哋奈我乜嘢何」!

而且要記住,佢做那個位,叫做政制及內地事務局局長。如果咁樣嘅風格可以做政制相關事務的阿頭,將來香港這個社會走向和解詳和,還是繼續充滿對抗張力,這一點大家應該有充分的心理準備。

他這一種語無倫次的態度,唔怕公開擦鞋的奴才作風,毫無為官氣度的品格,今天竟然可以做到問責局長,可以說是香港吏治墮落的一個最佳說明。

我以前曾經講笑說,他這一種直升機式的升遷,就好似一隻細龜突然變大龜。今天想來,以龜來形容他真是有些抬舉。想起了以前的皇帝曾經十分喜歡鬥雞。唐明皇甚至用一個13歲的?仔作內廷高官,原因就是因為他能夠把雞養得好鬥凶狠。在鬥雞遊戲進行之前,他還會在雞毛上灑上芥粉,又在雞腳及爪上架上一種叫金距的利器來增加殺傷力。鬥雞過程中把對手刺傷之後,羽毛上的芥粉就會增加對手的痛楚,令皇帝睇得特別過癮。既然北京高層都話忍咗香港人好耐,想來這位局長的升遷,除了是欣賞他的日月忠精之外,也是要投皇帝之所好。今天的共產黨及特區政府比唐明皇更簡單直接,直頭連嗰個13歲嘅?仔都唔使用,直接喺個籠度執隻鬥雞出嚟做高官。

這一個局長在訪問中又說,覺得香港「唔再係以前認識嘅香港」。這可能是整個訪問中他說得最好,也是最中肯的一句。香港梗係唔係以前嗰個香港啦,如果仲係以前嗰個香港,幾時輪到佢呢類人升做問責局長!殖民地時代肯定唔會!變成特區之後,在中共管治之下,就乜嘢荒謬嘅事都有可能發生!