文：水工部／插圖：小江
晚上十點，當Food Panda外賣員的Steve 接到一份晚餐的訂單，要把一盒焗豬排飯跟一盒黑松露野菌意粉送到一個位於新蒲崗的工廈單位。Steve（化名）心裡不禁納悶起來，誰還會在正常人糖水都吃完的時間叫晚餐外賣？
＊＊＊
晚上十一點，在新蒲崗一個佈滿昏暗黃色燈光的工廈單位內，有兩個人仍在對著電腦瘋狂剪片。「Ruth，妳可以去食飯未呀？」我問。「未呀，你等等，腦細又打嚟催喇，你食先啦！」「我都未食得，啱啱佢先打嚟催完我！」話剛說罷，我的手機震動起來，收到腦細的 whatsapp 語音信息：「你ren 完條片未呀咁即係？同埋你ren 完睇下Ruth 嗰堆野你有冇D野係幫到佢嘅，即係D effect 你好熟悉嘅就幫下佢唔該。你都可以同佢傾下佢手上嗰條片，因為我地聽日都要傾佢手頭上嗰條片點改。」作為有點經驗的影片製作者，想不到腦細的口吻跟一些以往接觸過的客戶，如出一徹，他們的一項絕技，就是從來不會清楚告訴你自己想要甚麼，卻不斷告訴你自己對成品不滿意，叫你回去再修改。
我說 :「你部電腦頭先ren 緊片時 hang 左機，而家要再ren 過！」
「笑左。」他說：「okay，咁你ren 埋好send俾我喇。同埋I mean你係睇吓Ruth(化名)條片，你唔使俾到啲咩佢，因為今晚個cut 係佢自己負責番。」「Ok~~」我回應了他一下，就繼續工作。二十分鐘後，又再收到腦細的信息：
「Still?」五分鐘後，我把ren 好的影片上傳到公司的Google Drive，再回應他：「有喇。」「Ok thx，咁你收得工未？」他說。「未，你開唔開到條影片？唔得我再ren 條容量細啲嘅。」
五分鐘後，我見他沒有回應，正打算下班回家，此時，電話響了起來。「喂，我睇完條片，真係唔明你搞咩搞咁耐喎。睇完我又唔覺得你加左好多野落去咋喎。點解你要剪咁耐？我地聽日要研究下呢個問題。同埋你條片而家好唔夠野，唔該你走之前同我加多堆effect 落去。」我心想，三分鐘多些的網絡影片，已經加了二十多個特效，即是每平均十秒就有一個特效彈出，到底你想要再加多少個特效？也罷，唯有回應事實：「咁因為部電腦ren 得慢喎。」「冇可能，公司部電腦應該十分鐘可以ren 完呢條片，一定係有啲野有問題，你提我，聽日我要睇一次你剪片，睇下你點解剪得咁慢。我本來應該可以去瞓覺，但當我啲員工仲做緊野而我去瞓覺，我就會覺得好唔舒服，你而家同我搞埋呢條片佢好即刻走喇。」「哦，好啦。」我回應。剪片的特效都是費時工，所謂的「加多堆effect」，至少又要折騰多至少一小時。唉，還是繼續工作吧。
十五分鐘後，又收到腦細的信息：「唔需要怕咗呢份工，但我需要你諗下，究竟出左咩問題，你會容許一部電腦咁玩你，而你唔到最後都唔出聲。」此時我心中已有一堆黑人問號，但為了能快點下班回家，我只好回了他一句：「係我未睇清楚啲性能啫。」「唔係。你即時預覽冇問題，render 有問題，明顯不關性能事。」「係setting 錯左。」我嘗試找出我的錯誤以回應他。「是。請別重覆犯錯就可。大家都係聰明人，你明我不滿咩。」「明。」回他一句後我繼續剪片。
凌晨一點，我估計腦細已睡了，把修改好的影片上傳到Google Drive後，我打算騎電單車下班回家。「你走得未？」我問Ruth。「未呀，你走啦，我今晚應該走唔到架喇。」根據腦細的邏輯，剪接並沒有標準工時說多長的影片就要用多少時間完成，而你要加班，代表你做得慢，能力不足，所以理應額外抽出私人時間來完成自己的責任，那麼，加班當然也不會有加班補水或補假。
＊＊＊
回到家樓下，停好電單車後，拿出手機一看：「可以收工未？」腦細在凌晨一點十分時說。「收左收左。」回覆後，我把電話關掉，從袋中拿出一根香煙，深深地抽了一口。
今天是我第二天在這家影片製作公司上班，明天早上十一時又要回去再上班。
＝＝＝＝＝＝＝＝＝＝＝＝＝＝
【腦細怪談】／採怪談者言
香港地除非含金出世，唔係都好難唔番工。啊，唔係，係含金出世都要扮番工，因為番工，係一種道德，係山竹打到嚟你都一樣要好乖咁去番工。世上的腦細，俾左錢你當你可以洗盡的不在話下，洗盡人仲要扮好老細的都不少。
有時腦細當勞工法例無到（咁又真係用處唔大的），蝦你唔敢告佢，就算告完都唔會賠幾多；有時，根本係個制度縱容腦細買起人命，於是就有人見風駛盡利啦，唔犯法架嘛；
有時腦細唔犯法，但捐窿捐罅剋扣你，又或者每日搞到你情緒勞動200%，呢啲無勞工法例可依，一係單打獨鬥一係自己認死狗一係聯合同事諗偈……
職場看似正常，事實古靈精怪，百鬼夜行，十足怪談，故有此系列，收集各位打工仔女的《腦細怪談》，係咪可趨吉避兇就唔知，但至少可以知多啲怪招，諗定偈仔，又或者，呻下都好過屈住！
本系列其他文章
===================================
[草根.行動.媒體]
網頁：https://grassmediaction.wordpress.com
臉書：https://www.facebook.com/grassmediaction
telegram channel： https://t.me/actionofgrassmedia