（獨媒報導）立法會延任一年後，今日正式召開首次內會，選出新一年度主席，李慧琼再度連任。負責主持選舉主席的馬逢國遭建制派及民主派批評主持會議混亂。他之後在等候點票期間更未有「熄咪」，多次喃喃自語爆粗「屌那星，你老母」。
於上年度內會主席選舉中，在時任副主席公民黨郭榮鏗主持下，經過17次會議仍未能選出主席；最終立法會主席梁君彥欽點陳健波取代郭榮鏗主持，內會最後由民建聯李慧琼與體演文出界馬逢國包攬內會正、副主席。
何君堯斥林卓廷「低級」引罵戰
在內會上，工聯會陸頌雄提名李慧琼爭取連任，會議之後由副主席馬逢國接手主持。民主黨林卓廷則提名何君堯，何拒絕提名，更批評林卓廷為「前低級ICAC調查員」。林卓廷即提出規程問題，指自己曾為廉政公署調查主任，認為言論冒犯。
馬逢國指言論屬「主觀判斷」
何君堯表示沒有必要澄清，「講咗就係講咗，事實嚟嘅。」馬逢國亦指不覺得言論冒犯，認為是何君堯的主觀判斷，不會處理林卓廷提出的規程問題，反指民主派批評其裁決是冒犯行為。
會議情況一度混亂，馬逢國之後示意民主黨黃碧雲發言，惟當黃一開口，馬逢國便斥「我嗌你唔係叫你發言」，引起民主派譁然。
公民黨郭榮鏗即批評馬逢國應清楚區分「主觀」與「客觀」言論，「如果我話葛珮帆係假博士，咁就係主觀啦」。公民黨楊岳橋亦質問，「係咪每一個建制派都可以話係低級？可唔可話你係低級主席？」馬逢國回應指「呢個係你主觀判斷」，重申不會再處理相關問題。
涂謹申認為何君堯言論冒犯，要求馬逢國堅守底線，「如果大家都係咁講，係會令會議程序阻慢，引起互罵，希望你再諗一諗。」
馬逢國唔熟書 陳克勤開口「指導」
不諳《議事規則》的馬逢國多次請教立法會秘書「咁即係點呀？」民建聯陳克勤之後亦按奈不住，發言「指導」馬逢國主持會議，「你係冇權處理規程問題」，要求儘快開始選舉主席。經民聯梁美芬及廖長江亦「幫口」，表態支持馬逢國已作出「終極裁決」。
梁志祥被指「官商鄉黑」
民主派之後展開「提名攻勢」，逐一提名建制派議員，惟沒有人接受。郭榮鏗提名「出名人格卑劣、與梁振英私通嘅周浩鼎議員」，何俊賢即投訴言論冒犯。馬逢國呼籲議員「對同事留一點尊重，唔好用不必要嘅言詞形容」，否則會收緊會議尺度。
民主黨許智峯則提名「官商鄉黑梁志祥」，梁志祥指言論冒犯，要求對方道歉。馬逢國未有理會，反問梁「你接唔接受提名先？」梁志祥即「扯火」要求馬逢國作出裁決，「唔該你啦，你作出裁決叫佢收返咪完咗件事」，許智峯之後收回言論。
李慧琼三度當選內會主席
被提名的毛孟靜之後要求「退選」，馬逢國更問「你係咪之後都唔接受提名？」毛孟靜則諷刺，「冇得咁問我，關你乜事。」在下午3時半，馬逢國指民主派濫用提名程序，宣佈「劃線」作出最後一輪提名，「考慮緊嗰啲我都唔會考慮」。
最終內會主席由李慧琼、楊岳橋、譚文豪、許智峯、葉建源、梁耀忠、郭家麒、梁繼昌及鄭松泰九人競逐。馬逢國指不會安排選舉論壇，將直接派發選票。李慧琼最後以39票當選主席；馬逢國則以40票連任副主席。
馬逢國拒認爆粗：唔sure邊個講
馬逢國在會後被記者追問是否在會上爆粗，他否認自己有講粗口，「唔 sure 邊個講，點可能知道？」有記者追問會上講粗口是否恰當，他則指刻意講粗口都「不太好」。他又指責民主派議員濫用提名程序，破壞議會進程，指「肉緊先激動，好多事情處理，要盡快開始工作」。