（獨媒報導）武漢肺炎疫情肆虐，新一季的港超聯球隊減少至八隊，富力R&F的退出更有說本地足球重回冰河時期。香港足球代表隊前成員、28歲的羅港威亦首次失業，他接受獨媒訪問時表示會莊敬自強，繼續努力訓練，「嗯，無諗過28歲就無波踢，自己又唔係踢唔到。」
港超聯開咧無班落，球員心情不好受，今次疫情富力R&F宣布散班，羅港威曾向六支港超聯球隊查詢「空缺」，但對方連薪酬都未問，便說沒有位。世界是現實的，每逢市道較差，球會便會跑出來說，希望能夠給年輕球員更多機會。「無話兩萬，萬二蚊我都踢，梗係踢啦，點會唔踢。」
訪問在大坑東遊樂場進行，羅港威顯得有點內斂，原來他有數天睡不著。南華年代的「左羅右華」，羅港威和艾華今季均未有球隊落班。
小五立志踢職業足球
小學三年級愛上足球，羅港威看到壁布板上的招募，便加入了校隊。小學五年級便決心踢職業足球 ，「想去到香港最好嘅位置」。後來踢屯門區隊，獲選拔加入香港U13，隊友還有梁冠聰和方栢倫。在日本比賽後回港，獲李志堅相中，以15歲之齡踢丙組的深水埗。
深水埗在李志堅帶領下，橫掃丙組和乙組聯賽冠軍，升上甲組，一眾足球小將黃威、羅港威、劉卓軒、梁冠聰、方栢倫、馮慶燁和李嘉耀等亦嶄頭露角。
2011年深水埗升上港甲，在高級組銀牌賽八強，羅港威射入一球，替深水埗追和南華，風頭更是一時無兩。一年後，羅港威跟隨李志堅轉投橫濱FC，在兩大外援前鋒福田健二和吉武剛壓陣下，出場時間較少。「我上季有入波，覺得唔抵，無理由要坐後備席。」羅港威遂提出外借要求，元朗和南華均對他有意思，最後加盟羅傑承治下的南華，「乙組嗰時對南華踢friendly，喺深水埗又踢到，可能係因為咁。」
羅港威（左三）2015年加盟香港飛馬再遇李志堅（右五），惟上陣機會不多
早離團未能共享「堅家軍」榮譽 羅港威稱無遺憾
2013年加盟南華，離開帶他出身的李志堅向外闖，羅港威形容這是重要的決定，「嗯，我覺得無揀錯。」「其實一早係要分開，接觸下唔同層面。」羅港威自言，和李志堅一直有較多的意見分歧，在乙組聯賽那年，他便曾有半年沒有上場，更一度打算離隊。
時至九年後的今天，李志堅率領「堅家軍」子弟兵，先在前年替大埔拿下港超聯冠軍，去年入主東方則取得雙冠王，羅港威未能共享榮譽。
「我無遺憾，足球講運氣。」羅港威認為，堅家軍「以前就係嘅」，指已有多名同期的隊友離開職業足球，如洪政業和李家豪等人，「如果佢哋都踢會開心多啲，依家走得太多人吧。」
左羅：我其實係右腳
羅港威的偶像是巴西的朗拿度，「我其實係右腳，好多人問我呢個問題，踢耐咗左腳可能仲順少少。」羅港威自小苦練左腳，左右腳自小五便均能傳擅射。他在深水埗踢中鋒出身，加盟南華後被改造成翼峰。羅港威不諱言，在陳偉豪、陳肇麒和李志豪等老將前，「初時感覺係驚嘅，迫自己更努力」。
為南華上陣踢亞協，羅港威自言，當時的心理質素是歷來最佳，「嗰時好想對其他國家嘅球員，好想出去踢比賽。」在2015年季尾，南華遲遲沒有向羅港威提出續約，他轉會到香港飛馬，再次跟從李志堅；但轉會後同樣坐冷板凳，只能在預備組賽事中上陣。「無乜特別感受，都係踢波啫，都唔會特別出你。經歷咗好多嘢，感覺唔同咗。」
曾與中甲緣慳一面 重投南華一季遇自降
在飛馬失去正選，羅港威曾提出外借，「我唔係想坐住逗人工嘅球員，我想踢呀嘛」，飛馬拒絕。羅港威當時曾獲中甲球隊梅州客家邀請試腳，但飛馬表示「無得去」。一年後重投南華，「左羅」如魚得水，並獲港隊主教練金判坤多次徵召，2017年對羅港威是順利的一年。
「你無諗過一個百幾年歷史嘅球會唔搞。」天氣不似預期，南華在季尾退出港超聯自降甲組，記者不禁問道，「算唔算第一次失業？」羅港威稱，「失業？無咁嘅感覺。」因為他很快便獲梁守志邀請加盟東方，薪酬更上一層樓。
跟東方簽約兩年，在第二季獲陳婉婷告知不會獲重用，富力R&F主教練楊正光提出外借。到了廣州，見識到外面世界之大。羅港威和梁諾恆住在同一間酒店房間，每日起床後便是練習，由早上到中午，「人哋球場真係pro啲，你睇下呢啲大坑東凹凹凸凸點踢？」
富力R＆F今季退出港超聯，令羅港威頓成「失業大軍」
嘆富力退場「好多從業員失業」
富力R&F人才濟濟，伊高沙托尼和迪布尼穩坐正選，羅港威亦只能越踢越後出任左閘，「無話唔鍾意，球員要配合教練，只係自己唔純熟。」
富力R&F退場，有球迷認為大快人心，港超聯不應有特權階級；但球圈中人不太同意。羅港威便認為富力落戶香港對本地足球的好處較壞處多，「始終多得一隊就係一隊，球市都好啲。你話高人工，其他國家Top嘅球會有邊隊唔係用一個好條件吸引球員加盟，足球就係咁樣。」
在內地生活的兩年，羅港威指廣州發展得很快，市區的發展密度可比香港。「網上講一句嘢可能好廉價、唔洗負責任，但無諗過呢行嘅從業員會失業，富力唔搞就少一隊，球員要湧埋另外八隊。要諗下囉，唔好講到咁，好多人無飯開。」
羅港威：真正鍾意足球嘅人係唔會後悔
窮途末路志彌堅，人生愁恨何難免。職業足球員生命短暫，香港運動員的路更是眾所周知的不平坦。羅港威一直的想法都是，「踢到踢唔到為止」。說到這裡，他雙眼發光望著記者，「你知唔知？真正鍾意足球嘅人係唔會後悔。」
他在效力飛馬和東方時曾兼讀毅進課程，在差兩科便完成時，富力R&F又提出外借，至今未拿到證書。如果可以再重來，羅港威都會選擇踢職業足球，但希望能先好好裝備自己。
今年3月因為疫情由廣州回港，羅港威和朋友開網店「虢礫緙嘞」，在社交網站作直播，為客戶推銷產品，從中賺取佣金。羅港威亦一直沒有考足球教練牌照，他承認曾想過投考紀律部隊，「見到咁樣（警暴）都費事啦，我係都唔會諗嗰邊（警察）啦，可能係消防員同懲教囉。」
翻查2013年東亞運的港隊名單，23名球員中，連同羅港威共有11人已離開職業足球或今季沒有球隊落班。羅港威已預告，今季有機會重返甲組深水埗，希望能保持狀態和訓練，「深水埗依家仲傾緊，但會踢甲組，希望半季可以轉返去港超。」
「有無後悔踢職業足球？」羅港威毫不猶豫便說，「冇後悔，始終我自己鍾意踢波」。「嗯，感慨係⋯踢咗咁多年，我28歲，28歲就要踢唔到港超聯、最top嗰層。你有無諗過28歲就要踢甲組？」他一直在啐啐念。
記者：麥馬高、周頌謙