立法會清一色建制派，明日大嶼研究撥款之前仍然成日傳「有變數」、「有阻力」，其實只不過係進行緊各大利益版塊增加自己議價籌碼既階段，等同政府換好自己利益，自然會全體歸位撐萬億人工島，不必有太多的幻想。
好似今日鄉議局主席劉業強走出黎做專訪撐明日大嶼，話風一轉就立即叫價要放寬「祖堂地」出售成數門檻，再叫價減低公私合營發展農地比例到由7成首置跌到5成，全部徵收各級農地價平均$800/呎升到甲級 $1300/呎，食相最難看個位真係非你莫屬。
已經冇哂傳統宗族規訓賣祖先地既敗家仔，好多祖堂地一直因為業權分散賣唔到俾地產商起豪宅，有唔少現時都做左棕地，似乎好唔甘心俾政府未來收黎起公屋居屋，所以想自己攪埋地產或者快手賣個好價俾地產商，口講話增加土地供應，其實係賣地自肥。
其實劉業強你作為行政會議成員，自己唔走出黎義務護航，反當政府係棵搖錢樹，咁明目張膽拎公眾利益黎換你地私益，以為冇左ICAC拉你就代表冇人知道? 你利益申報表講自己新界有成幾百塊農地，幾十間新界地產投資公司，全部都會因你既建議而水脹船高。
呢個就係立法會剩番既得利益既惡果，任何議題都成為佢地一次分餅仔既機會。明日大嶼塊咁大既餅，工程、融資、分地利益一大舊，有票扭扭下都可以換到一舊，繼續想跑馬仔既從政者又點會介意犧牲市民利益，預佢地一份?