【獨媒報導】位於牛頭角東九文化中心外的階梯LED花海裝置，「白色花海」遭網民譏諷為靈堂，民政事務總署昨晚將白花蓋上綠布並圍封。民建聯觀塘區議員張琪騰稱項目成本約50萬，目前仍在施工階段，民政處已與承辦商作溝通，知悉市民「有啲咁嘅感觀」。對於被質疑似靈堂，張琪騰就稱：「我自己就無乜呢種感覺⋯⋯好坦白。當然大家每個人睇任何一啲藝術裝置，或者事物、景物都會有唔同睇法。」
去年《施政報告》提出，18區地區青年社區建設委員會要為當區設置具特色的打卡地標，觀塘就以白色花海為主題，原擬種植真花，但最後因技術考慮及支出預算，項目支出約50萬元。然而，有網民昨日將白花照片上載到社交網站，引起熱烈討論，更有人譏諷為「靈堂」。
張琪騰（資料圖片）
不按照原計劃種植真花？ 張琪騰：曬得犀利會枯萎
張琪騰今早在商台節目《在晴朗的一天出發》表示，方案曾在觀塘地區青年社區建設委員會討論，聆聽青年委員的意見：「大家覺得都好嘅，有啲委員分享話外國，譬如韓國、泰國等等地方，都有呢類似呢啲花海嘅打卡點。」他認為，在東九文化中心加設藝術裝置能吸引更多人流，包括居民、遊客。
「白色花海」將在明日進行試燈，並在下周二舉行亮燈儀式，張琪騰稱留意到社交網站有群組討論，指現階段仍「施工緊」、進行執漏工程。至於為何不按照原計劃種植真花，張琪騰表示：「因為真花要淋花，唔係就曬得犀利，可能啲花會枯萎⋯⋯」
指會議未有討論細節 稱部門已知悉市民「有啲咁嘅感觀」
至於有市民認為，「白色花海」會予人觀感像靈堂，張琪騰認為可以作微調，但承認在會議上未有討論「白色花海」的細節：「我都留意到成支花都係白色嘅⋯⋯以前嗰個莖可能其他顏色嘅。我哋開會都無討論到咁細節，大家主要都係俾意見，建議邊個位置打卡點最好，影相嗰個位置。」
民政處昨日將白花蓋上綠布並圍封，張琪騰表示，處方已與承辦商作溝通，部門已知悉市民「有啲咁嘅感觀」，將會作出微調。主持追問張琪騰，是否認同「白色花海」在日間「白色一片唔係幾好」。他表示：「我個人好坦白，我覺得真係無問題。可能有啲人就傳統啲，或者點樣啦⋯⋯我個人睇，真係無問題。」