【獨媒報導】的士牌價跌勢持續，市區的士牌價跌至218萬元，較歷史高位暴跌70%，有媒體早前引用 DeepSeek 分析，的士牌價最終可能淪為「象徵性價值」，例如10至20萬元。車主們自然不會坐以待斃，業界接連有「動作」。新界西北的士司機從業員總會原預計今日在政總發起20人「集會」，要求中央禁止「滴滴出行」、「高德打車」白牌車營運。
不過昨日宣布「集會」又告取消，總會主席黃永忠今早在電台節目表達「初衷」是希望中央「搵啲高官」約見整改，指示滴滴高德「唔好嚟香港搞搞震」，並曾去信中聯辦及特首李家超。昨日有傳媒找到黃永忠回應，他今稱昨天「講錯嘢」，「有啲人叫你唔好講你又講咗，告你囉咁簡單」，又稱「唔夠膽再講嘢喇」，只會繼續試搭白牌車，指「佢唔停手，咪搵中央嘈下」。
黃永忠（資料圖片）
昨日黃永忠以「反白牌車大聯盟」聯絡人身份向傳媒發出採訪通知，訴求包括要求中央協助禁制網約車平台「滴滴出行」、「高德打車」白牌車營運，預計20人在政府總部集會，稱已向「警察部」申請。
不滿滴滴高德殺入香港「搞搞陣」
「集會」最終又告取消，黃永忠今早在商台《在晴朗的一天出發》回應事件，他解釋Uber是海外公司，「香港啲法律去唔到荷蘭咁遠」，然而最近兩大內地企業「滴滴出行」和「高德打車」突然「殺嚟香港做無牌經營」，違反與運輸署的承諾，他早前親自試坐兩間公司，發現的確有違法白牌車運作。
他稱上周已向「有關國家單位」發送資料，要求中央「搵啲高官約見整改」，又指國內企業都是「中央話事」，若果中央通知一聲，「大企業仲嚟香港做嘢？我相信唔夠膽㗎喇」，若然企業堅持繼續違法，「中央大把方法應付佢啦」，他最希望要求中央有關部門「約見佢（滴滴和高德），希望整改吓，唔好嚟香港搞搞震」。
資料圖片
曾載聲稱中聯辦人員 獻計找警聯部「可以做到佢」
主持人問到背後的「中央」人物到底何方神聖，黃永忠表示對方其實是一名的士乘客，對方稱是「中聯辦嗰啲人嚟嘅」，並獻計「我哋有個國家單位可以做到佢」，建議黃將資料發送中聯辦，並稱會有專責部門負責，又指中聯辦和香港警方有聯合單位，吩咐可找「孟援」部長。翻查資料中聯辦警務聯絡部副部長名字確實相似，叫「孟小援」。
不過黃表示在聯絡「孟援」部長的過程有困難，幸得港府中人幫手，他昨日將3封請願信和資料 WhatsApp 予中聯辦，以及電郵去信特首「李先生」及運物局局長陳美寶。主持問到是否有人與黃永忠約談見面，黃即表示「唔好講咩人」，他見過不同官員，但「我哋唔講得咁多，禁止我講嘢，我講嘢畀人告㗎，唔講得㗎」。他又指昨日在《香港01》 「講錯嘢，都好大鑊」，不過自己「做正經事，告咪由佢告囉，都無可奈何」。
資料圖片
昨日「講錯嘢，都好大鑊」 急澄清中央非辦事不力
到底在《香港01》講錯甚麼？黃永忠直言「有啲人叫你唔好講你講咗，咪錯咗囉，告你囉咁簡單」，他稱不夠膽再講，只會繼續每日試坐滴滴和高德，若果情況繼續，「咪搵中央嘈下」。
主持人再問，黃已找中央，若兩間內地企業的違法行為持續，豈非中央辦事不力？黃永忠立即澄清，「唔係唔係唔係，中央辦事一定唔會不力」，而是某單位不聽中央指示。他在訪問尾聲透露申訴渠道，除了要求中聯辦聯絡港澳辦，的士團體還可以「有機會上去北京公安總局㗎嘛」。
翻查黃永忠昨日在香港01表示，中央「經已有兩個負責人來香港解決件事。如果今次唔停，唔畀面中央政府」，他指決定給予機會改善，若「一個禮拜內無改善，咁咪繼續做囉」。