繼上星期有香港大學學生會成員被拒入境澳門，今個星期開始，喺澳門入面，有活躍社運、政治嘅人（包括本人在內）亦發現被跟蹤。有記者表示，手提電話又出現「回音大」嘅現象。此外，《愛瞞》網站近日亦受到來自中國DDoS轟炸嘅數據流量，《愛瞞》嘅電郵地址，亦被 Google 提醒近期曾受「有國家資助的攻擊」(state-sponsored attacks)。
以上種種跡象顯示，澳門、中國當局最近聯手加強對一切可能喺澳門出現「反對聲音」進行監控同壓制。
根據以往經驗，喺「大時大節」（包括快到嘅10月1日）嘅前前後後，拒絕「黑名單香港人」入境、監控澳門有機會舉行示威嘅人嘅現象係「常態」，但今年似乎「早咗啲」開始。如果純粹係「大時大節」示威，通常只有澳門政府出手監控，而今次有跡象顯示中國政府都出埋手，又早咁多開始，我大擔推測，喺兩三個月內，可能會有北京高官訪澳。
澳門任意拒絕旅客入境係行政當局濫權行為。而作為澳門社運人，喺澳門制度下「可以做」嘅行政申訴、刑事檢舉都做過曬，剩低只有被拒絕入境嘅旅客以個人身份向澳門法院申訴，但因「判斷何謂『威脅澳門內部安全』」係行政機關行使酌情權內範圍，上訴勝算機會低，而且以往已有人打過類似官司，最後都係輸。
所以，我大膽建議香港朋友，如無必要，最近都係唔好過嚟澳門，以免嘥你時間同船飛錢，直至有「北京高官」離開為止。如有工作需要，請優先考慮用遙距視像會議進行。
原載2016年9月10日《愛瞞》