正所謂「紙媒界之將亡，必有妖孽。」 前身為「Soccer Wave」 o既足球雜誌「Soccer World」近日死灰復燃，唔知冧掂邊條水魚開倉投資，呢本業界劣品再次強勢復辟，先唔好講佢地以前點掠水法，以為佢地復辟會扮下業界良心，點知第一期就加價到25蚊，誠意送上之前動漫節免費派發o既BFB遊戲卡，呢種掠水行徑竟然冇人筆伐口誅，皆因香港人太好人。
念舊，就係香港人其中一種優良品德。但唔好彩o既係，有人總會利用香港人念舊o既品性去招搖撞騙。
SW頭炮就係咁輕描淡寫之下成功掠水大躍進，為免令讀者第二期開始抱怨，即刻變返做18蚊，曾經問過好多人點解買呢本野，大部分人都答價錢經濟，又有海報送下，梗又係o既，去7仔食碗即食麵，唔通仲彈人地麵難食咩，平呀嘛，唔通聚集喺7仔門口示威咩，包容下啦香港人。
但個問題黎啦，18蚊，買本SW，點解唔俾多7蚊買本專業好多o既足球周刊呢？難道7蚊差距就係SW讀者抗拒既o既主因？答案可以話啱咗七成，剩餘一個原因就係可能因為足球周刊係大陸野，部分人寧願撐香港作品都唔買大陸野，情有可原，呢度唔花篇幅多講，但點解唔揀另外一本足球雜誌進攻足球呢？因為價錢，既然都肯俾多7蚊，點解唔要本專業o既足球周刊而要本一般質素o既進攻足球？如果去開圖書館o既朋友，每個星期都有上一期o既進攻足球任君選讀，綜合以上幾點，價錢成為SW o既護身符，加上雨傘運動個期出力支持黃絲，令年青人多咗一份好印象，所以SW 復辟係有跡可循，冇得掠水鬼出咩。
有人會問，點解要買足球雜誌？又唔係每日update，點解唔上網睇？拿，有人的確鐘意揸住本野睇o既，好似d大人咁好多都鐘意買份報紙，睇唔睇得曬係次要，重點係買咗，好似每日打機登入咁o道理，讀者呢種習而為常，就成為紙媒撐下去o既動力，反觀後生仔，好多都寧願上網睇新聞，至於點解都買本18蚊o既SW，平呀嘛，有本野揸手睇下圖片拎下海報，唔錯呀，內容係點，邊個咁介意啫？
而SW眼見銷量未達到掠水o既高峰，梗係故技重施，之前同BFB合作搞過送神秘球員活動，然後不了了之，上次可能冇人告佢告到去商品說明條例或者消委會，皆因香港人都係普遍善良o既，何必搞到人地收檔呢？而SW眼見香港人健忘，第二期就聲稱買書送遊戲code，有機會抽到市值一萬幾銀港幣o既遊戲球員美斯，於是好多非讀者都走買書，有人甚至一次過買118本書，為咗一個code，而SW今次策略成功曬，為谷銷量乜野做唔出啫，背後個個老闆要睇銷量業績，編輯部梗係要加把勁取悅老闆啦，第一期玩懷舊，勾起舊讀者o既同情心，第二期玩送貴野，勾起玩家們o既貪念，咁第三期玩唔玩埋買書送門飛？反正獎品可以變成編輯部送俾編輯部o既形式，好似第二期咁第一時間澄清有人抽中，但係邊個抽中就唔會有人知，呢一招萬試萬靈，但我呢就冇辦法唔鄙視佢地，衰d講句，同擺地攤o既天仙局有分別？只不過手上多本廢紙。
筆者抱住去明將食壽司o既冒險心態，即管買本SW睇下，睇完之後先知一如既往廢，大部分內容大眾化，同上網睇冇分別，例如有個欄目「ICONICS」，冇啦啦又拎賓特拿出黎抽水，什麼結構神……一早喺中外網上被抽到乾塘0既賓特拿，都拎黎抽水，又冇新o既Gag，純粹係倒帶，文筆似足叫春文始祖贊師傅@足球說故事，反正橋唔怕舊，最緊要有人受，贊師傅就寫什麼迪斯高，一如既往，拖埋朋友落水一齊叫春，足球界o既鄺俊宇，呢個朵我冇俾錯佢！SW其他專欄都係一個簡潔過一個，一張圖搭配例湯過例湯o既文字就介紹完新里奧費迪南列斯奧斯福，踢一場波就神化佢，搞掂又一篇。唔講新野住啦懷舊下先啦寫下米祖，又係個d網上大把o既論調，毫無特色，到寫完球員就寫下其他九唔搭八o既野，例如什麼走過北韓大地，聲稱派人到訪當地，成本足球雜誌即刻變成旅遊雜誌，唔知同足球有咩關聯，仲要連出兩期，最後訪問下李德能,上網搵幾段野寫多篇日職同東方球隊既介紹，收得工，再搵埋d網上fans club出黎唱雙簧，成本雜誌咪熱鬧多野睇lor。
又一期，18蚊，簡直係好過搶銀行，搶銀行係率直的犯法，搞SW係鬼祟的合法，前者掠得多但風險極大，後者掠得少但風險計細，喺呢個不求深度只求三分鐘熱度o既社會，SW應運而生，自然有佢掠水的成功之道。
最後，我都係冇拎本野當草紙，我都係聽朝返工個陣，俾d回收報紙0既公公婆婆，日行一善可能冇咁易癡線，當我自責緊點解仲要買本SW個陣，可能我出篇文可以挽救到下一個傻瓜。
PS：睇SW寫足球，不如睇下贊師傅幾時寫下佢同誠信破產o既編輯部費高情同手足o既愛情故事，就好似葛斯同萊斯個篇文咁寫，寫到人地急不可待互吻菊花還嫌不夠o既感情，真係感動到讀者嘔埋隔夜飯再冇胃口幾日。
PS2：以獨立媒體同SW可能存在既交情，呢篇文分分鐘被del acc都冇埋，唔緊要，但願敢言才是每一個作者剩餘的東西，而不是迎合，溫性，愛全世界。