自從有咗電腦，電視一早已經好似變成古董，連我老媽子都用Ipad追「來自星星的你」呢類韓劇，可想而知TVB嘅師奶劇已經喺香港市場打敗仗，TVB唯有寄望內地市場、東南亞市場以及海外華人市場「幫拖」先得，雖然偶有佳作例如「天與地」，又或者睇得過嘅劇集例如「巾幗梟雄」、「怒火街頭」、「忠奸人」同「使徒行者」，但整體黎講，已經冇乜意慾打開部電視劇，就算網上頗得好評嘅劇集，我最多都係上MYTV望兩望，然後轉上YouTube睇「尋秦記」、「九五之尊」等等，追返以前TVB劇集一定過癮過追時下TVB新劇，點解唔俾錢買TVB收費電視台?因為佢地播個套未必啱我心水，我鐘意自己點播咁睇，直到佢地出咗個收費Apps「Go TV」，等大家可以俾錢睇返以前既劇集，我都係冇俾錢，因為我細細個已經睇開ATV，TVB嘅節目對於我黎講，係冇咁大影響力。
以前我屋企真係專門睇ATV，新聞，綜藝，劇集，一定鎖定ATV台，當我仲回味緊「殭屍道長」系列，鐘意林正英嘅正氣同念舊，極討厭徐少強嘅陰濕，ATV已經出咗「我和殭屍有個約會」，顛覆咗我對「殭屍」嘅傳統概念，原來「殭屍」唔係一味木木獨獨「彈下彈下跳」個隻，可以咁「潮爆」好似「況天佑」咁，真係大開眼見，個年我先7歲，已經晚晚追睇劇集，連我亞爺都一齊追，可想而知，當時ATV係幾咁「創意爆燈」。
「我和殭屍有個約會2」，從第一集到大結局，每一集都咁好睇，馬小玲同況天佑嘅愛情固然令人印象深刻，但萊利同詩雅、正中同女鬼貞子、將臣同馬丁噹幾條感情線都可以做到催人淚下，成套劇既緊湊又鋪排舒服，個首主題曲真係聽上癮，「原諒我當天不懂得珍惜，只知任性，壞事情……」，呢首歌詞至今係「賣飛佛」。
劇集陪伴好多人成長，原諒我不懂得TVB「創世紀」、「天地豪情」等有幾好，ATV劇集我睇過唔少，大製作如「再見艷陽天」、「大地恩情」等等，用故事sell慘情係司空見慣，用農民階級生活為基礎拍出一套身處苦難仍能自強嘅劇集就真係好睇又勵志，好難唔吸引觀眾睇，個期ATV無論自家製作同外購劇都非常出色，例如「包青天」，睇何家勁做「展超」睇的多，睇呂良偉做「展超」一樣好睇，又例如「還珠格格」，紅到成個香港都認識「小燕子」和「紫薇」，收視甚至打瓜TVB堪稱經典，又例如「梁山伯與祝英台」，梁小冰做「祝英台」，羅志祥做「梁山伯」，故事感人，演員發揮唔錯，勢估唔到喺劇中衰到痹嘅「馬文才」陳嘉輝，現實中竟然同梁小冰係戀人，個陣我身為一個小朋友，都耿耿於懷咖，因為真係好鐘意梁小冰。
「百萬富翁」呢個節目又係亞視一大傑作，每逢星期一三五夜晚就睇「百萬富翁」，同屋企人一齊估埋一份，邊個輸左就做掌上壓之類，個陣冇電腦搵答案，大家都係靠自己估，一家人個種投入唔會輸比電視機入面嘅參賽者。
同埋亞視嘅劇集冇一套係垃圾，呢一點大家可以認真去考究下，例如「電視風雲」講拍劇嘅血淚史;例如「暴風刑警」，尹天照唔做「殭屍」做警察同謝君豪呢個大奸角兄弟反目;例如「縱橫四海」，陶大宇由奸變忠，譚耀文由忠變奸，兩兄弟大決鬥簡直令人拍爛手掌;例如「萬家燈火」，擺明車馬好似「真情」咁款一家人舉埋一齊唔係打交就係BBQ，結果拍出黎更勝「真情」，劇情多層次又變化多，唔會一味sell親情。真係是但舉出一套，都唔會好似如今TVB個班膠劇咁令人谷氣。
我記得亞視08年拍過一套「法網群英」，我建議大家有興趣去睇睇，主角係吳啟華，成班好戲之人喺度交手，我上網從第一集睇到大結局，水準甚高，因為個編導係鄧特希。
2012年12月31號，ATV出咗「歲月留聲」呢個台，我本身都唔知，後來有一日唔覺意見到屋企人睇緊「包青天」，嘩d童年回憶返曬黎，於是我竟然開始睇返電視，見到「萬家燈火」又睇，見到「我和殭屍有個約會1-2」又睇，連之前冇睇過嘅「千王之王重出江湖」都睇埋，曾經以為謝君豪套電影「南海十三郎」係經典，估唔到喺ATV見到林韋辰之前拍過「南海十三郎」，個種調皮同盞鬼，係我令我感動的，因為ATV真係曾經帶俾香港人好多歡樂。
我已經唔理宜家D人點踩亞視，喺好多人心目中，亞視就係我地嘅集體回憶，我真心鐘意睇ATV以前所有劇集。
見到亞視冇得續拍，心中難免有一絲失落，因為驚「歲月留聲」呢個台都折埋，咁我以後點重溫亞視經典節目呢?我仲未睇張國榮套「IQ成熟時」啊！