凡戰者，以正合，以奇勝。正合的既段過左，香港撐民主既人出哂哩啦，接住落哩我地要試下出奇制勝，轉圓石於千仞之山。做個比喻開頭，去到宜家呢個僵局，我地各位砂粒微塵，更應合成一顆大滑石，立場堅定不移，手段卻不妨靈如滑石，教敵人捉不住，摸不著，必要時跣佢一鑊甘。點跣？就要番番細佬上次條屎橋，遊戲說明開始。
放心，大家所有既回應我都有睇。有人話，去鳩嗚有重新佔領街道既可能，所以警方先有顧忌。而我所講既吹到雨傘為號，全民起義。若無實際手段配合，點會得到政府關注？的確，係香港，單以虛招抗爭效用不大，但若果能吹到上中國大陸就唔係咁話法。
因為，重點，因為呢個係一個bug，一個威權政府統治模式既bug。係香港大叫689下台當然無人理你，但換轉係大陸試下叫習總下台？有無人敢？公安會唔會唔理？一個獨裁政府要維持運作就要滅絕所有係公共場合既反政府意見，好多係香港本土影響力唔大既舉動，一到大陸就會變得極敏感。香港人未feel到，因為我地某程度上仲有一個爛爛地既護盾，叫做一個國兩制。
我認為往後香港既抗爭模式，就係要用我地既創意，妙用一國兩制的隱藏功能，呢樣野無人教到我地，因為世界只此一例。
而其中一個我覺得玩得過既，就係透過筆戰、網絡戰、意識戰，或朋友口中的虛招，全面挑動中共神經。我地宜家目標明確，就係升級行動，先搵bug，然後死篤爛篤，篤到佢lag 機。愈能夠引起中共反應既野，就愈係佢脆弱既罩門。
係我講點搵bug之前，先俾多些少耐性。因筆戰最重要有清析思路，否則只會自亂陣腳。有幾個重點，必須大家了解一下。我只係拋磚引玉。大家請多加在comment 或討論區上激辯一番，各出奇謀，指點指點，黎個網上練兵。
第一樣野，中共而家佈下既棋局，由人大落閘起，下下殺著，沒有絲毫談判的空間；雨傘運動一起，就被定性為動亂，想要憑恃一國勢力壓倒兩制原先定義。喺意識上，中共以愛港愛國為統戰一眾親共的口號，再配合一眾新奇有趣既類別：沉默的，愛港的，愛國的大多數……將所有話題政治化，撕裂社會。由運動開始，CY既工作就係不停火上加油，連同警方採取強硬手腕，激化社會矛盾。再講多次，呢d舉動，目標從來都唔係以理服人，解決問題，對象，唔係你地呢班少數人，而係唔想表態的一眾順民。邏輯唔重要，最重要搞到社會分化，黃營山頭愈各自為政，就愈好統戰。呢d就係我上文所講既二元對立。意識上，只得呢招。
新鮮出爐既二元劃分法有「原本好少數既泛民」，大鳴鼎鼎雷鼎鳴教授既「多數知識份子」，仲有清場前689最新主打：「好激的非法行動到後期留下的人」。總之務求將整個黃營一分再分，孤立再孤立。長遠目標，即將國家安全問題籠罩香港，以後有咩佢睇唔順眼既人出現，就用顛覆國家政權罪將個行為納入國家安全範疇，一變成國安問題，就係國家層面，大家想反抗，就危害緊全國人民。
二元對立既困境將我地呢班自以為精叻既政治初哥，套入遊戲程式set好既圈套。睇睇網上同雨傘運動有關既議題，周不時見到有人不停將人分類。點解？就係中左二元分立既毒，非我立場即為敵人，這樣香港人自然會四分五裂。答案唔重要，最重要係呢個直線思維既logic，反正呢類二元議題唔會完。
咁所有問題都總有正反，點先算入左二元對立？二元對立同正常思辯有咩分別？
老實講，呢個世界有論點就有矛盾，有矛盾就有辯論。成個運動要維持活力，靠既，反而係一個不停論政既辯論氣氛，個運動先可不停微調，不停進步。但如果大家有玩過debate，就知到真正的辯論立場並唔重要，同一條打足幾代人既中學生應否談戀愛既辯題，今次做正方下次做反方，完全唔成問題，唔會話做反方就變左同學公敵。簡單講，二元對立重點係顯示你個立場，正常思辯是關心你既論點。前者對人，後者對事。
當然打政治工既政客例外，但作為一個普通爭取民主既市民，我地係唔能夠自己標籤自己人。記住，政治立場只係市場，有票之後，我地係僱客，呢次buy呢個，下次buy那個，得閒格下價比較下都仲得，除非講大話，唔係無話唔buy就變敵人，更何況宜家要槍口對外？從來都係有橋，拋出哩，有人buy，就自自然然有人做。
唔岩口味？寫文跟我瘋狂辯論。無需要下下就拋出歸類人地既圈圈，例如以前既走資派，右派，宜家既熱狗，左膠，港豬。因為一拋呢ｄ圈圈，就係扼殺左大家思考既空間，就好似ｄ人一句講哂你地而家犯法嗎。因為呢ｄ圈圈唔係俾人諗野，只係安個罪名標籤你，醜化你。呢ｄ圈圈開頭好似幾合理，但後來就會變質，被利用成打壓異己既工具。愈用愈易受人帶動，愈易情緒化，諗野愈死板。完全唔用好難，不過要用就要用得收放自如，必要時一笑置之。想更進階探討二元對立的讀者，請看最下面括號文字。
咁我地應該點做，坐以待斃？非也。我認為真正既升級，係將矛頭直指中共，不再糾纏於港共木偶。中共全面禁止學生北上，佢驚既，係我地將火頭燒左上去上面，呢個係唯一影響到佢既野，所以佢好需要689，幫佢不停檔箭。然後坐山觀虎鬥，同當年大鳴大放，三反五反同一原理，睇我地自己人打自己人，兩敗俱傷，大亂過後一次過收割。
升級，係要升級個威力，而唔係個行為；武力升級，只係升級左個行為，唔一定升級左個威力。武力升級點做法好多人諗緊，我宜家做緊既野係搵另一個升級方法，開多一條新戰線──全面網絡意識戰。大前題，係要中共有呢個bug，呢個我地只出虛招佢都會過份反應既bug。
所以，我邀請各位一齊試下有無呢個bug，好簡單，過兩日12月13日南京大屠殺紀念日，就係一個試bug好時機，識玩，不如試下咁玩，請廣傳:
「南京大屠殺，全國一心，舉傘哀悼，帶傘上廣場，帶傘抗屠殺人民政權，帶傘抗血腥殘殺人民事件，帶傘維護民主新中國。」
當然，嫌呢句和理非非，請自己加點創意，改到岩自己口味先推出去。只要中共反應愈大，就愈代表呢個bug 存左。若只小數五毛出聲，小bug。有議員出聲，中bug。有官員出聲，大bug。有bug的話，大家之後大把野玩，計仔連綿不絕。 若試完之後，天安門等政治敏感地方，一切如常，舉傘係公安面前行都無反應，無bug。唔好意思，大家另找出路，無擇犀唔會再寫文浪費大家時間。
（後加）可惜篇文出得哩，13日己經過左，如果唔得，不如幫我放上高登，uwant等度度佢？例如12月25日，聖誕佳節舉傘報佳音，上廣場宣揚愛與和平。 目標係劍指北京，有敏感既日子，敏感既地方，就係宣傳雨傘既愛與和平訊息既好機會。（奸笑，你懂的）
（For想進入八奇思考領域的讀者：歸根究底二元對立只係一個空中樓閣，一個抽象的概念，係一個理論上既concept，現實政治縱橫交錯，你係好難完全分辨點先算二元對立，敵我矛盾，各位大概明我既意思就得，只要貼緊客顧，理性，不標籤，對事不對人，我相信所有政治掩眼法都會無所遁形。
不過如果我一開始就同大家講呢樣野，又有幾多人會聽？所以我一定要創造一個二元對立既陰謀論，再妖魔化／客觀描寫中共呢個角色，大家就會好入腦，覺得真係有個咁既敵人。我所講中共係咪真係咁，我又唔係佢條蟲，唔通真係知咩，中共只係一個政權，一班權貴既組合，唔係真係有個呀爺？有個程式？有一個咁完整既機器？某程度上，可以咁諗，我只係塑造緊呢個叫中共既敵人，團結大家，都算係用緊二元分立邏輯。
呢樣野無得化解，係人腦思維既惰性，完全唔用佢，只會連思考既能力都無埋。我地要學識接受佢，自行消化佢，駕馭佢，21世紀要爭民主，不能倚靠少數精英帶領，而係要各自思考出路，但各自思考，不等同各自為政，百花齊放，係要通過激烈而又不會劃分地盤的辯論。作為一個精明既消費者，我地要有一個靈活既頭腦，唔好左一句唔埋兩句就套個角色落人度。有資格堅實地抱緊一個有廣闊政治光譜既民主社會。
回到最後你就會發現，係俗世上我地唯一可以信靠的只有一套自由公平民主既法治制度。諗下諗下我地兜左個大圈又番到起點的老生常談，希望大家既思維轉左呢個圈又上左一層。呢個係我地開始筆戰前，或我地香港人追求民主的第一堂公民政治課。）