資料圖片，來源：stock.tookapic.com
我份人真係比較學院派，對傳媒仲有好多今時今日恐怕已經不切實際的要求，搞到自己好勞氣。
例如 Native Advertising，引入香港已經廿年有多，一開始新聞學院已經在批評，結果呢，在今天的 Social Media KOL 年代變本加厲。所謂 Native Advertising，就是賣廣告賣到好似平時內容一樣，你睇完先知原來賣緊廣告。咁樣做的問題有兩點，第一係讀者在沒有選擇的前提下睇咗廣告，避都冇得避；第二係咁樣做其實係出賣緊自己的公信力，日後你再講任何嘢都會有人懷疑你係咪收咗錢。
如果我今日收得某份雜誌錢喺度同大家講睇呢份雜誌代表生活態度，即係以後你都可以質疑我響度鬧侵侵係咪收咗美國民主黨錢。Sorry，我的公信力，唔賣嘅。亦因此，我會好老套的認為 Native Advertising 的問題不限於主流媒體，就算 Social Media KOL 也一樣，因為兩者理論上都應該係靠公信力來生存。我知好多人現在做 KOL 只係為賣廣告搵食，但有冇諗過呢件事係自相矛盾的？
我唔係話唔賣得廣告，畢竟人係要食飯的，但你要講到明俾我知你賣緊廣告，我可以將廣告同正式的內容區分開，唔會誤會。最理想，就係一開始就講明「以下為贊助商內容」，我可以自己選擇睇唔睇。但今時今日，好多傳媒將呢句說話放到有咁細得咁細，有咁隱蔽得咁隱蔽。例如在 FB，就特登整到要按「see more」之後先睇到原來係廣告；甚至廣告呢兩隻字都唔用，變成「推薦」、「推介」之類。此風實不可長。
當然，也有些專頁擺明條條片都係廣告的，咁我反而接受到。都係嗰句，廣告和正式內容，唔該分返開……
題為編輯所擬