康文署宣稱佢哋喺香港站花咗百幾萬整嘅「故宮壁」，唔係廣告而係「展覽」。作為一個討厭廣告、熱愛展覽嘅文偽青年，我當然第一時間衝去欣賞啦！去到就發現，「故宮壁」真係劃時代嘅展覽，好多方面都相當創新：
一、入場費 — 好多展覽都要收費，想睇「故宮壁」，除非你咁啱經過，否則都要科水先睇到。但奇就奇在，呢筆入場費唔係康文署收，而係港鐵收（展覽位處港鐵收費區內）！港鐵已經收咗場地租金，係咪應該嘔返啲入場費畀政府呢？（不過學生入場有半價，至少喺呢件事上「故宮壁」同一般展覽係冇分別嘅。）
二、展品 — 你有冇見過一個展覽，有一半展品係重複架？我見過，我真係見過！「故宮壁」兩側嘅展板，除咗圖同字嘅擺位有少少分別外，基本上內容係一模一樣！睇其中一邊已經OK，咁點解要出兩邊嘥錢呢？
三、文字 — 每次睇展覽，我都會仔細 lun 展板啲文字，加深對展品嘅認識。「故宮壁」有好多文字描述，不過全部「黐地」，加上場地燈光根本好難閱讀。到底啲字係想畀人睇，定只係裝飾呢？
四、導賞 — 睇唔到字，諗住聽導賞了解多啲故宮嘅建築啦，點知導賞員只係不斷重複講「使用扶手電梯時，請企穩及緊握扶手⋯」，真係令我搲晒頭，莫名其妙。
五、宣傳 — 一般康文署展覽，好似莫奈名畫展，展出之前同期間都會周街見到宣傳廣告。呢次就完全冇事前宣傳，仲要出咗先話係展覽，真係好有驚喜喎！
六、紀念品 — 睇完展覽，諗住買啲精品留念啦，不過一路繼續行，只係見到間便利店。入到去，冇故宮文化工者趙廣超嘅《大紫禁城》賣，亦冇坦克車貼紙、血手印印水紙賣，略嫌美中不足，唔可以為觀展體驗留下完美句號咯。
講到尾，搵得媒體代理去安排呢兩塊「展板」，換咩叫法都改變唔到「故宮壁」係廣告呢個事實。唔想畀人話浪費公帑，就攞「展覽」一詞作包裝，一切都只係語言偽術！若果政府真係覺得呢個係「真．展覽」，不如就用呢個方式繼續展示故宮精品，咁就連起博物館嘅錢都可以慳返啦！
P.S. 圖片攝於香港站「故宮壁」展覽範圍，絕無tune 色；拍攝時並無實Q阻撓，比起一般不准拍攝嘅展覽，「故宮壁」喺呢方面就符合人性多了！
唯恐你唔知咩係「血手印」同「坦克車」，傳送門
=========
廣告狂人大賞2016 公眾投票現已開始！立即投選心水作品，令真正多人睇嘅作品獲得重視