噓你國歌看世界

啱啱香港對不丹嘅世盃外圍賽，中共國歌比全場開汽水，大陸憤青即刻大罵香港人係狗，又話全世界得香港會有主場球迷噓國歌，港人真係好無恥。

大陸憤青又一次暴露井底之蛙嘅本質。今年嘅西班牙國王杯決賽，咁啱由巴塞隆拿對畢爾包，開波之前嘅播國歌環節，比全場十萬人狂開汽水，分貝達到120，西班牙國王塊面燶到爆 [1] 。 巴塞隆拿所在嘅加泰隆尼亞（Catalonia) 地區同畢爾包所在嘅巴斯克 (Basque) 地區，代表西班牙兩大分離獨立勢力。呢兩個地區嘅語言，歷史同西班牙嘅前身（Castile) 都唔一樣，佢哋喺上世紀西班牙法西斯統治下，係重點被打壓對象。巴塞就好似加泰隆尼亞國家隊，每次對代表西班牙建制嘅皇馬，就好似一場戰爭。喺巴塞隆拿市嘅遊客區，亦周圍貼滿提醒遊客 ‘Catalonia is not Spain’ 嘅標語。上世紀嘅巴斯克游擊隊亦主張武裝抗爭，直至西班牙實行民主政制，並要符合加入歐盟對少數文化嘅保育同尊重，游擊隊先係近年先放低武裝，走入議會繼續爭取更大嘅自治或者好似蘇格蘭形式嘅獨立公投。

其實今次場決賽本來定係馬德里踢，但係皇馬唔想自己個場變成比兩大分離勢力騎劫，最後喺全西班牙都無城市想接手呢個燙手山芋之下，場波變咗喺巴塞個魯營球場踢。西班牙政府喺決賽第二日，即刻出咗個聲明，話兩隊球迷傷害西班牙人民嘅感情，破壞西班牙嘅和諧，大肆抨擊話佢哋暴力傷害民主 [2] 。乜啲說話咁似中共／港共嘅？冇錯，西班牙政府對於一年前加泰隆尼亞有八成選民支持獨立嘅公投，都係話公投係西班牙係唔合憲，唔合法，你哋獨立要問過全西班牙人咁話[3]。不過，西班牙始終都受歐盟嘅人權條約所約束，除咗放吓嘴炮都無乜嘢可以打擊兩個地區嘅獨立聲音。

喺歐洲崇尚人權自由嘅制度下，加泰隆尼亞同巴斯克人即使未能成功獨立，都起碼可以保住自己嘅文化同語言。至於香港，大家繼續祈求中共某日開恩，又或者等到中共倒台，建立民主政制一日，香港應該都比新香港人完全攻陷玩完。同埋，如果去巴塞隆拿旅行，千祈唔好以為自己好x 醒，著住件印咗Xavi嘅西班牙波衫周街走，會死人的。

原文刊於《本土文集》

Photos credits : Cover photo ; [B]; [C]