終於，我係東方蘋果都見到一致的報道，前線警員爆SEED喇！對於佢地既不滿同質問，我幾乎大部分都舉腳認同。我支持你地加入抗爭，向管理層發聲。之不過，我怕就好似目前香港既情況咁，只怕當權者都係會繼續無視，不管你地既死活。到Touch Wood你地都頂唔順要行動升級，按章工作甚至發動罷工既時候，可能，你地會明白點解香港搞成咁。同埋我好想講，大家針對既警方一直都係高層既處理手法，雖然我知同袍要互撐，但我奉勸你地無須太介懷一D鬧警察既說話，我絕對相信香港有好警察，而人地都係鬧緊衰個D。我都唔會因為聽到人鬧示威者係暴民就情緒失控，因為我知我唔係，但如果我因為咁走去用武力解決，咁我就變成左暴民既一分子。我都知好難控制情緒，日日都比人鬧到狗血淋頭，仲可能要搵命，但著得套制服，你地就係專業既執法者，希望你地對得起呢個本應人人尊重既身分。
大家都係香港人，做咩要分得咁仔細？唔好再用立場去區分啦，如果你認同扔磚/行使暴力既就係暴民，咁無論佢係示威者定警察，總之扔磚個個就係暴徒。咁個事實係，示威者入面有暴民，警察入面都有暴民。暴民就係癲左會使用暴力既人。咁就要諗清楚，咩叫盲撐暴民。你鬧人係暴民既時候，要記得同你立場相同既人入面都有呢類人存在。好希望大家都可以將心比己，無人想受傷，暴民打人真係好變態，暴民示威者打警察既同時，都有失控既暴民差佬毆打示威者，以暴易暴係解決唔到問題。使用適合武力同行使暴力係一線之差，幾時先真正要出胡椒噴霧/警棍/催淚水or 煙甚至係槍，用咩力，打邊個，扑咩位，我相信你地係專業，如果你真係專業。所有事都事出必有因，如果警察繼續無理地升級咁多既裝備，例如AR 15、布袋彈、橡膠彈、催淚煙、手榴催淚彈同準備緊買既水炮車，咁對家同樣都會無理地仿效當年暴動咁出磚頭、菠蘿炸彈同汽油彈⋯⋯因為你地同意左以暴易暴。而好明顯都睇得出邊一方裝備精良，究竟邊個係暴民？
如果雙方都試下換個角度諗一諗，究竟會點？
我尊重警察，記得前前前一哥講過「點解要叫差人唔叫警察？警察好差咩？」之後我一直都叫Police做警察，直至前一哥上場開始，我叫返某些Police做差佬。
根據傳媒報導，有前線警員在WhatsApp群組中，臚列對管理層20項不滿和質問。
1. 在旺角當晚係邊個做指揮？
（在旺角當晚係邊個做吹雞？）
2. 佢有冇接受過PTU訓練？
（佢有無接受過訓練？）
3. 點解唔使用相應嘅武力？
（咁示威者遇到失控差佬既不合理暴力，點解唔可以用相應嘅武力？）
4. 在暴動的情況下點解唔使用IS Tactics(防暴戰術)？
（廢青表示：SORRY，呢個好難唔識）
5. 點解要前線同事用血肉之軀抵擋磚頭？
（點解要前線示威者用血肉之軀抵擋某些失控差佬既過分暴力？）
6. 究竟當時決定打定唔打？打，就應使用相應武力；唔打，就應該立即撤退。
（廢青都想問，究竟當時警方想點？咩叫相應武力？總不會是開槍吧？唔打，就應該立即撤退。同意，但我所見既係有某些失控差佬變左暴民衝入示威者群中使用警棍扑人。）
7. 磚頭係致命武器，點解唔可以用槍去保護生命？
（磚頭係致命武器，點解唔可以用返磚頭去保護生命？好似兩邊都有人扔磚。仲有，如果呢句成立的話，咁如果你比一個情緒失控既差佬拎著手槍指住，點解唔可以用磚頭去保護生命？BTW，請留意時序，當時應該未有磚頭BUT拳頭。咁應該係用警棍？）
8. 新聞報道講：警員被暴徒追打！管理層有何感想？
（新聞報道講：示威者被暴徒追打！政府有何感想？）
9. 有咁多同事受傷，亦有些受重傷，管理層有何感想？
（有咁多市民受傷，亦有些受重傷，政府有何感想？）
10. 防暴裝備同IS Tactics(防暴戰術)如果唔係用來對付暴徒，咁係咪只用來擺房和用來表演用？
（警例如果唔係用來規管犯錯既差佬，咁係咪只用來擺房和用來表演用？）
11. 高層唔好再講強烈譴責呢啲廢話，更加唔好講前線同事好克制，只會令同事愈聽愈嬲！
（建制唔好再講強烈譴責呢啲廢話，更加唔好講政府好克制，只會令市民愈聽愈嬲！）
12. 點解畀暴徒猛掟磚頭，嗰啲高層依然叫同事企喺度做人肉盾？究竟係乜嘢戰術？如果要企，懇請所有高層同前線同事一齊企，畀暴徒用磚掟，睇下邊個唔好彩被掟死！
（點解畀差佬猛用棍扑頭用槍指住，嗰啲泛民依然叫示威者企喺度唔好反抗？究竟係乜嘢抗爭？如果要企，懇請個D非暴力潔癖撚同前線示威者一齊企，畀差佬用棍扑，睇下邊個唔好彩被扑死！）
13. 掟磚頭係致命武器，高層是否同意？再有類似事件，前線必定會take covers(找掩護)同埋使用槍械去還擊，唔會再做人肉磚靶，因為已經受到生命威脅，高層是否同意？但如果仲有啲無理無常識高層要前線再做磚靶，咁點？前線是否唔需要理會？定還是由得前線犧牲送死，因為前線生命係賤命，高層升級仲緊要過前線生命？
（警棍／手槍係致命武器，政府是否同意？再有類似事件，前線必定會take covers(找掩護)同埋使用抗爭方法去還擊，唔會再做人肉棍靶，因為已經受到生命威脅，政府是否同意？但如果仲有啲無理無常識非暴力潔癖撚要前線再做棍靶，咁點？前線是否唔需要理會？定還是由得前線犧牲送死，因為前線生命係賤命，和理非非仲緊要過前線生命？）
14. AR 15(半自動步槍)、布袋彈、橡膠彈、催淚煙、手榴催淚彈點解全部唔用？管理層只驚傳媒，市民點睇，就唔驚前線同事點睇！難道咁激烈嘅暴行都唔應該用上述武器？如果適用但無畀指示叫前線用，很明顯不配做呢個階級，所有高層是否要責任承擔及徹查事件？會有咩罰則？
（泛民只驚傳媒，普羅市民點睇，就唔驚前線示威者點睇！難道咁激烈嘅暴行都唔應該抗爭？如果有失控差佬使用左過分武力變暴民，很明顯不配做警察，政府是否要責任承擔及徹查事件？會有咩罰則？）
15. 前線同事冒生命危險去對抗暴徒，維護法紀，但CP(警務處處長)嘅記招居然回應會徹查前線有否不恰當使用其他武器，知否已經傷透所有前線同事嘅心同士氣，很悲哀！警隊果然係一將功成萬骨枯！
（前線示威者冒生命危險去對抗失控差佬，維持發聲，但民主黨、公民黨嘅聲明居然回應譴責暴力，知否已經傷透所有前線示威者嘅心同士氣，很悲哀！果然係一將功成萬骨枯！）
16. 如果所有武器同戰術都係唔用，只係擺房，可否罷免再去training(訓練)，因為係晒(嘥)時間同多餘，警隊自從佔中燒催淚煙後已經有啲龜縮唔敢再用催淚煙！更遑論橡膠彈、布袋彈、AR15等等！
（如果所有抗爭形式都係唔用，只係唱歌叫口號，可否罷免再去遊行集會，因為係晒(嘥)時間同多餘，政府自從689上場開始已經唔再理會其他意見！更遑論遊行集會、拉布、佔中同雨傘等等！）
17. 今次事件係管理層作出錯誤決定，導致很多前線同事受傷，是否同意？點同前線交待？經常講責任承擔，管理層有否勇氣承擔責任？點承擔
（今次事件係政府施政錯誤的惡果，導致很多警察和市民受傷，是否同意？點同大眾交待？經常講責任承擔，政府有否勇氣承擔責任？點承擔？）
18. 今次暴徒暴行，前線同事應該可以開100槍以上，同埋應該係遠距離作戰，點解仲要推前線同事去送死，用人肉擋磚？而家前線同事已經冇士氣呢個係因果，亦好難修復，管理層點回應？
（今次暴徒暴行，失控差佬應該可以拉佢坐100年以上，同埋應該係內部處分，點解仲要比佢影響其他警察變埋失控差佬衝去持棍扑人，搞到推前線示威者去送死，用人肉擋棍？而家前線示威者已經冇士氣呢個係因果，亦好難修復，政府點回應？）
19. 請不要打算用讚賞去畀受傷同事去覆蓋同事嘅不滿，前線同事係有尊嚴，不要當我們係傻仔！
（請不要打算用譴責暴力去覆蓋示威者嘅不滿，前線示威者係有尊嚴，不要當我們係傻仔！）
20. 前線同事呢幾日嘅憤怒情緒係無停過！
（香港市民呢幾年嘅憤怒情緒係無停過！）