一直以來，我都以為香港的核心價值，不是法治，也不是自由，是錢。香港從來都是搵錢和洗錢的好地方，有錢，置業安居不在話下；有錢，更可享受奢華生活，聲色犬馬，錦衣玉食唾手可得；有錢，甚至可以翻雲覆雨，請咩英國御用、全港最貴大狀打官司 ，法律女神都要睇他們面色做人。
今日我先知原來不是，一大班人同錢作對，置摧毀香港百年基業的惡法於不顧。中聯辦王志民都講漏口風話大國博奕，咁賭注係乜？香港囉。贏乜？捉幾十個貪官富商抄家回血，港人毫無得著；輸乜？香港繁榮穩定營商環境。道理就是如此簡單，大家是否要扮鴕鳥視而不見？佔中封幾條馬路，經濟學人雷鼎鳴都話損失三千幾億。咁外國睇淡香港前景，今舖要輸幾多？你仲要陪阿爺賭落去？倒錢落海就有。
係，最好當甚麼事都沒有發生，百業興旺，香港發大財，但會否太不現實？美國反對，歐盟28國反對，因何解究？為公義，定亡我中華之心不死？廢話，當然一樣為錢。條例通過，外資在港資本不受保障，員工隨時成人質，還有誰敢留在香港經商？
今日港府若要繼續無視反對聲音，一意孤行硬推法例，最壞結果是可以預期：外商陸續撤資，香港國際金融中心地位不保。老老實實，你搵夠未？我就未搵夠，至少未夠全家移民。班大老闆拍拍蘿柚走有咩所謂？好似某富豪轉移資產後周遊列國都不知幾疏肝。做細就慘囉個個做哂陪葬品，公司隨時摺份工唔多穩陣，供緊層樓仲變埋負資產，到時樓股匯市齊冧，大把人臨老過唔到世，真係上IFC天台都要排隊。
你話我靠嚇？咁關焯照王弼話外資會撤資純屬吹水，梁美芬林健鋒急放盤一定係巧合。唔該大家清醒少少，不要再欺騙自己，襯現時尚有轉彎餘地，6月9日一齊參與遊行，向逃犯條例說不，守護香港，守護自己辛苦賺來的身家財產，多謝各位。
PS 同意請廣傳