facebook 截圖
佢當年（亦即係我當年）買 600 呎樓係講緊 fresh grad 年薪10倍，依家係20倍，佢所謂儲5／6年首期今時今日就變咗10／12年，其實應該講 infinity，因為以2006至2013嘅數據，樓升1.8倍，住戶入息僅增3成，即係你儲夠10年，就會發覺個龍門已經變咗20年，儲夠20年， 龍門變40年，唔駛再講落去，因為已經到咗平均死亡年齡。
我望住呢班中年人都好心傷，佢地嘅盲點就係完全無視當年大環境比佢地嘅助力同現今嘅變化，成日就叫年青人去佢當年打魚嘅地方搵食，連個塘已經乾咗都仲蒙查查！
撇開資產價格唔講，佢哋亦睇唔到打工仔收入同付出唔公平嘅地方，七十／八十年代係公平嘅年代，下圖所示，你幫公司賺幾多，你亦攞番幾多，labor productivity同household income大致同步增長，但係九十年代開始走樣，慢慢地，你幫公司越搵越多，但係人工增長停滯，咁佢上咗岸做老闆咪越搵越多，買貴晒啲樓，你打工就搵極都係一Q樣，越嚟越買唔起樓，佢老丙囉晒著數，然後仲要嘚你一句冇出息，真係連我同樣係中年人仕都睇唔過眼。
chart from scmp.com
年青人，快啲去搶咗佢個觀塘議席啦，一日呢啲老而不當政，一日你哋都無得翻身㗎……