大約早兩日，金融發展局主席查史美倫就走出來講左句令人非常費解的說話： 「 以1861年美國解放黑奴，大約100年後，1968年黑人才可獲投票權，我唔係話香港都要100年先有民主，但係爭取民主需要時間，2017唔得啫，你點知2022無？點解唔袋住先？阿爺依家話畀你，你都唔要？」
今次，我就唔評論呢段說話有幾無知同無內涵，因為好多人已經做左，我只係想講個故事比大家聽。
嗰一晚我聽完呢段說話之後，我久久不能釋懷，不能釋懷不在於這段反智說話，而是令想我一段往事，一段令我發誓以後唔再食Melon既故事。
是咁的，首先其實我都係好鍾意食生果乜乜乜嘅，所以我同反佔領個呀叔一樣，出街一定會拎住把生果刀，個道理同《少林足球》裡面汽車維修員去踢波拎士巴拿一樣，但其實兩者（鍾意食生果同拎生果刀出街､汽車維修員去踢波拎士巴拿）根本一啲關係都無，唔通有份發明飛機既人會插兩隻機翼係背脊咩，痴痴地線。
講番正題，由細到大，我都真係幾鍾意食Melon，貪佢表皮光滑有裂紋， 肉脆又多汁。有一次，去香港其中一間比較大型既超級市場買Melon食，因為嗰時佔領運動仍未爆發，所以唔存在向外國勢力購買物資呢個問題，咪扣我帽子唔該。行行下，見到有個呀姐就係到向人不斷叫賣，唔睇都無問題，一睇我就比佢吸引住，講清楚一啲，唔係比個呀姐吸引住，而係比佢賣既野吸引到，「Charles Melon」大大隻字寫住，自問小弟「Hami melon」､「Bailan melon」､「Canary melon」､「Galia Melon」，就算日韓既「Kakumero」同「Korean melon」都食過曬，就係未試過呢隻「Charles Melon」，一睇個價錢都幾貴，咁都唔緊要啦，人一世物一世咩都要試下，就買左番去，而惡夢亦隨之而來。
番到屋企我即刻用御用生果刀切開佢，瀟灑。但我無即刻食，我要慢慢欣賞，15分鍾過去，發現呢個「Charles Melon」，竟然比起平日的Melon形態更美，然後我再用了十分鐘去打燈放白紙，再為其拍照。這短短的三十分鐘，算是我思緒最安穩的時間。去到呢一步，我都認為一切係我掌握之內，點知我一放落口，咦！有陣怪味既，我初初以為自己個鼻有問題，我再大力一吸，屌咁大陣腥味既，但我作為一個好哥哥，一定要同呀妹分甘同味，於是我等埋我妹妹番黎，話留左「Charles Melon」比佢，點知佢一咬落口就爆左句：「Charles Melon？臭嘅喂！」由嗰晚起，呀妹唔再食我買比佢既生果，而我相信嗰陣味呢一輩子都會記得，有時經過番嗰個超級市場､見番個呀姐我都會諗起呢件事。
當我諗番起呢件事既時候，又令我聯想到一件事，就係查史美倫個老公平時點頂架？咁我上網維基一下，原來佢老公就係查懋成先生，佢其中一個公職係香港藝術節執行委員會委員，我當堂明白了，原來查懋成先生平時係睇開藝術品走藝術路線，難怪佢會鍾意講野咁有藝術、個樣咁抽象既史美倫啦。所以幾時都話有句說話好啱，「蔫猪頭有盲鼻菩薩。」再臭再難頂既事物都一定有人慬得欣賞，或者叫會有人頂左佢，而且我相信上天係公平，睇番個大環境，無論梁振英又好､查懋成都好，可能佢地的班係好有錢，不過有個難頂老婆呢，呢個考驗唔係人人都受得起架。
最後，我怕大家睇唔明，家陣畫公仔要畫出腸，我重申一次，「Charles Melon」和「查史美倫」純粹讀音相似，我無話過佢地係同出一轍，姐係「Charles Melon」係臭既唔等於「查史美倫」都係臭，因為我無食過，臭唔臭呢個問題要問番佢老公先知，Okay？
題外話，「搽屎」上身又點會「美輪」丫，你地話係咪啦，唔怕生壞命真係最怕改壞命。