阿強，一個典型香港仔，凡事搵錢至上，佢細細個就已經聽人講，香港出路其實好窄，撇除咗專業人士，搵到錢嘅行業首選係去撈金融，所以每當同同學討論大家將來嘅理想職業，佢都會一副說教口吻：
「阿恒，你第時想做IT呀？？想下好喇，你梗係無上網睇過『IT折墮大典』，做IT分分鐘餓死你呀，喺香港，識撈一定係撈金融。」
阿強果種對搵錢嘅強烈欲望，令到佢整個求學時期都未試過「夢遺」。阿強當然都會對異性產生好奇同幻想，但比起女性嘅桐體，更常出現喺阿強夢境中嘅，係見到自己坐喺一橦中環甲級商廈入面，當落地玻璃外面嘅普通人為咗生計而埋頭苦幹嘅時候，阿強就喺玻璃嘅另一邊對住幾個電腦大螢幕，望住動輒過億嘅銀碼上上落落，一副運籌帷幄嘅模樣，就咁諗下都已經夠晒興奮。阿強覺得，未試過夢遺並唔係咩成長憾事，夢遺就只不過係繼「尿床」之後第二樣唔成熟嘅男性生理現象，真正成熟嘅男人，應該係要識得搵錢。
就係咁，阿強大學畢業之後，好順理成章投身金融行業。佢同好多年輕中環人一樣，既然想喺銀行界搵大錢，當然希望入到令人趨之若鶩嘅IBank做，那怕只係做一個「二打六」，人工起碼都高一截，之不過，入IBank並唔容易，你揀人人揀你，精於計算嘅阿強好明白依一點，所以佢決定先武裝自己，自我增值，咁先可以提高成功機會。
喺香港嘅填鴨式教育薰陶之下，「自我增值」依一回事並唔存在，香港人所謂嘅自我增值，最終目的都係為咗自我嘅財富有所增值，學習從來唔係為咗improvement，只係單純一項investment，而金融業正好就有唔少「專業資格」同埋「考試」，等住一班金融界叻仔爭住俾錢去投資。
同其他行業一樣，依D考試可以簡單劃分為兩大類，第一種就係根據法例規定，你必須要通過考試取得資格，先可以從事某類職位/工種，如果係工作上有須要，公司通常會資助你。第二種就係為咗整靚份履歷，希望令僱主們覺得你夠上進，主動學習同工作有關嘅知識，而近十年最為炙手可熱嘅考試怕且就係CFA (金融分析師/財務分析師)。
之所以有咁多叻仔叻女驚死執輸仆住去讀，係由於「CFA是投身IBank的入場卷」依種諗法，如都市傳說般傳開去，覺得考晒咁多份paper就會大大提高俾IBank睇中嘅機會，所以即使每份paper要洗成皮幾兩皮野 (假如一take pass嘅話)，每年仍然有一大批年輕中環人進貢，手握住果疊厚厚嘅Notes，好似其中一隻腳已經踏進IBank嘅大門口咁，雖則實情係兩隻腳要「抹」開一字馬差D爆軚先摱車邊掂到人哋門懢，但好歹都叫做多個機會，洗多D錢都值得嘅。
不過，上一回曾經提及，阿強只係一個外表光鮮嘅「金融界基層」，每個月搵得唔多，本來餐餐都要捱「X士茶餐廰」，宜家仲要儲多筆錢黎交學費同考試費，對阿強嚟講真係幾吃力，但佢並無怨言，佢甚至覺得自己好似修練緊葵花寶典咁，「欲練神功，揮刀自宮」，為咗有機會入IBank，為咗可以搵其他人一世都搵唔到咁多嘅錢，犧牲係必須，所以佢甘願放棄生活，放棄一切，決定孤注一擲，無論如何都要考晒CFA。
偶爾見到有同事毅然辭職，到外地working holiday，又或者想趁後生周圍遊歷、擴闊視野，對於心目中只有「中環」同「X士茶餐廰」嘅阿強嚟講，多多少少不是味兒，因為咁樣會顯得阿強嘅世界好細，佢唯有避免進一步打聽對方嘅事，情形就好似亞洲男性喺厠所遇上鬼佬一齊企喺度痾尿咁，你硬係要好奇偷望對方嘅尺寸，最終只會自討沒趣。
「只要可以入到IBank，到時就有大把錢環遊世界，值得嘅！」
每逢節日，阿強都會搵唔同理由去推卻各種朋友聚會，一嚟為咗減省不必要嘅開支，二嚟佢擔心，擔心自己嘅考試會成為大家嘅話題，例如問佢「點呀未來IBanker，考晒CFA未呀，第時發咗你唔好唔記得細佬我喎。」，須知道，成班醫生護士喺個陽痿病人旁邊吶喊助威鼓勵佢勃起，即使大家真係出於善意，但對於果位病人嚟講，無論如何都只會徒添壓力，一D幫助都冇。
「只要可以入到IBank，到時每個朋友都會對我另眼相看，值得嘅！」
每當喺Facebook上見到昔日嘅同窗，陸陸續續搵到自己嘅終身伴侶，成家立室，一雙一對甜蜜嘅笑容，對於畢業多年只顧日盼夜盼入IBank而無暇拍拖最終唯有靠ThisAV解一時身心慰寂嘅阿強，恍惚係一次又一次無情嘅嘲笑。
「只要可以入到IBank，到時你慌我會冇女咩，值得嘅！」
只要、到時、只要、到時……
日復日，年復年，終於，阿強終於以逢二進一嘅速度，Pass晒三份CFA paper。佢望住電郵上面所顯示嘅考試成績，竟然激動到喊起上黎，事關佢個腦不斷回憶起依幾年黎刻苦艱辛嘅日子，等嘅就係依一日嘅成果。
皇天不負有心有，阿強好快就收到面試邀請。
「咩話？問我俄羅斯試圖貪併烏克蘭，同國際油價有咩關係？CFA都好似無依一題嘅……」
阿強認為，今次面試失敗，只係一時唔好彩，並唔係佢嘅問題。
不過，一次，兩次，三次……
阿強開始有少少不安，點解佢苦心修練多年嘅絕世武學，好似派唔上用場架呢？情況就好似岳不群自宮之後，揭咗去葵花寶典第二頁，先發現上面原來寫住「即使自宮，未必成功」。但既然都洗咗咁多錢同時間，阿強唯有安慰自己，一切嘅努力並無白費，宜家只係仲爭一個機會。
可惜，上天就好似睇住阿強嚟玩咁，佢無意中打聽到，先前果位毅然辭職去周遊列國嘅舊同事，回港後無耐就入咗高盛，因為人哋就係想聘請一D擁有廣闊視野、見過世面嘅人加入，對方有冇考CFA根本就係Who fucking cares。原來，不用自宮，亦能成功。
接二連三嘅打擊，令阿強自信心動搖，佢開始質疑自己嘅能力，質疑自己當初所有嘅決定。
但最令佢崩潰，係見到當日俾佢揶揄嘅老朋友阿恒突然出現喺報紙財經版。
「港80後IT專才建立遊戲王國，獲基金青睞注資」
阿強宜家終於明白，想成功唔一定要練葵花寶典，出人頭地亦唔一定要入IBank。
「阿強，你仲撈緊金融呀？？你梗係無上網睇過『金融界打工仔血肉史』啦…啦…啦……」
依一晚，阿強不斷夢到阿恒咁樣同佢講，最後嚇醒咗。
喺空洞嘅房間入面，除咗聽到自己急促嘅呼吸聲之外，仲有一陣由阿強大腿內側所散發出黎嘅異味。
依一嚇，就連阿強果個發咗多年嘅IBank夢，亦都一併醒埋，但夢醒過後，遺留下嘅並唔係一個正常男士因「精滿自溢」而洩漏嘅體液，而係一大灘尿。
對上一次尿床，已經係廿幾年前嘅事，當時阿強剛剛來臨依一個世界，來臨一個叫做香港嘅細小城市，對未知嘅將來感到害怕；廿幾年之後，阿強依然對自己嘅將來感到徬惶，花咗咁多年光陰，佢先開始懷疑自己係咪入錯行，但如果唔撈金融又可以做咩？除咗入IBank，自己又有咩想做嘅事呢？
阿強望住窗外果個幾乎被一橦橦高樓大廈所遮蔽嘅夜空，諗咗足足成晚，但一件想做嘅事都諗唔到。
喺香港生活最令人感慨之處，唔單只係居住空間狹窄、向上流嘅空間狹窄，就連夢想嘅空間都一様狹窄過人，我哋比起果D「窮得只剰下錢」嘅土豪更加可憐，因為我哋係「窮得只剰下搵錢」，我哋用成世人嘅時間去努力搵更多錢務求自己成世人都唔須要再咁努力，「搵錢」變成整個社會所抱有嘅唯一夢想。
「每個人都是天才，但如果你用『爬樹能力』來斷定一條魚有多少才幹，牠整個人生都會相信自己是愚蠢不堪。」
作者facebook page: https://www.facebook.com/devilcard