中聯辦主任張曉明今日幫民建聯黨慶捐贈自己寫嘅「度德而處」，並籌到一千九百萬，重高過國學大師饒宗頤嘅墨寶成五倍有多。小明用行動證明寫字都可以致富，只不過這些機會⋯⋯
講返個字，其實「度德而處」呢個詞語係出自《左傳》，意思係衡量自己的德行係唔係能夠服人，估計自己的能力又可唔可以勝任。 政治既野我識條鐵，我只可以喺度以字論字，睇下呢幅野襯唔襯得起呢四個字。
落筆衰衝動有頭無尾
平心而論，小明都叫做食過下夜粥，筆劃都叫寫得似模似樣，係衰在佈局。佢既問題係落筆欠周詳，令到成幅字鋪排好唔穩陣。大家有無留意佢嗰四個字都係上面幾筆寫到好粗，結果令到下面啲筆劃唔多平衡？「德」字好明顯係上面十字玩大左結果要心字找尾數，變成上重下輕；「而」字上面個橫夠晒重，但係衰在落筆太高呢，呢個字本身就矮，第一筆寫高左，結果咪令到張野啲字愈寫愈細囉。唉我希望小明剩係寫字先係咁啦。
一味施壓無圜轉
另外小明寫字既問題係用筆一味用力唔曉變通。四個字幾乎每一筆都係重筆，寫字好似音樂，講既係節奏，成首歌下下重拍你都唔想聽啦。其實佢又唔係無圜轉，例如「度」同「處」字既長撇，可惜一到後段要轉彎收幼就突然kick一個大lick，跌踵左一舊，成為敗筆。「處」字最尾一捺，用意係撐起上面個几字，但係去到最後就唔小心收唔切掣斜向下面，結果個几字就變左就黎碌落山咁樣，又點「度德而處」呢？
埋尾一錯再錯
幾經辛苦終於睇到落款，我諗去到呢度小明都寫得好辛苦，諗住可以過關，結果就奶野喇！頭三個字「丙申秋」無問題，寫到自己個大姓就中伏真係寫大左，首先一般黎講年份同名之間會隔一個空格，另外字嘅大細亦都會差唔多。個張字寫大左，就即刻陷入兩難，小明兩個字應該跟機寫一樣大定寫返細好呢？結果佢選擇左後者，而兩個選擇都無好結果。曉字寫得太密、印章偏細呢啲問題亦都只係幫幅字「錦上添花」。
總括黎講，我覺得呢幅字完美地成為左「度德而處」呢四個字嘅反面教材。至於點解咁都賣到千九萬，只能夠話藝術嘅野我識條鐵咩！唉無乜野我都係返去寫字先⋯⋯
*圖片來自香港01