成日聽人講，以前生活點點點辛苦，宜家生活點點點幸福，其實每一代人都有壓力，都有不為人知的苦難，如果以前係苦中作樂，宜家的生活就偏向笑中帶淚，先唔講大人個筆，就講下小朋友，我個細妹係讀小學三年級，功課已經多到嚇死人，日日做完功課仲要走去補習，如果唔係考試成績就會飄忽，我望一望佢的功課，我先知原來小三要記咁多中文詩詞同英文單詞，數學題已經發展到要計算幾何面積，我個妹八歲，已經要喺功課中掙扎，我唔識評價香港教育制度係好定唔好，我只知香港的小朋友唔知從幾歲開始，已經冇曬童年，每日要活在做功課的日子當中，莫講話出街玩，連睇電視都會俾屋企人鬧。
我記得我細個，生活條件唔係好，仲俾屋企人送返深圳讀書，而我爺爺係好堅信「藤條下出狀元」呢個理念，撞正我個人運動細胞強勁成日鐘意出去踢波打波，於是我細細個已經俾爺爺打到成身都係疤痕，而且老一輩都好挨得，所以佢地覺得小朋友要百打先會成才，要餓其體膚先會成才，於是我成日食飯都冇肉食，夾多條咸菜都會俾爺爺鬧，冬天要用凍水沖涼，夏天要用去樓下個井托幾桶水上屋企用，早上要自己踩單車返學，放學要幫手去街市買平價菜，當其他小朋友食零食個陣，我得個望字，值得我自豪係我成績幾好，呢方面全靠爺爺教導有方，所以我細細個已經知道讀書好先有出路。
我鐘意踢波，而且踢得好，好快就入埋校隊，第一次得到掌聲就係喺球場上，我面對對方高大後衛一個巧妙轉身，將個波撩過佢個頭，再將球波射入龍，個陣我第一次覺得踢波可以咁有成就感，於是我好俾心機踢波，直頭一返學見未集合，已經走去踢波，中午食完飯又去踢波，放學又去踢波，踢到爺爺親自黎學校帶我返屋企。
鐘意踢波，只係鐘意人地讚我叻，直到我鐘意睇波，我先真正迷上足球，繼而令我上癮，改變我人生，為我呢個窮小子帶來無盡的快樂。
自千禧年第一次凌晨睇列斯聯對拉素，我開始學識「做賊」，成日凌晨偷偷地起身睇波，為避開爺爺的察覺，我係費煞心思，從扮訓到輕輕偷落床，我起碼試過10種方式同姿勢，而且冇鬧鐘要知醒都係不斷訓練出黎，以前讀書時期精力旺盛挨夜訓都冇問題，於是每逢有歐聯或者列斯聯，我都會偷偷走出廳睇波，試過俾爺爺捉到「藤條炆豬肉」，試過無數次收緊呼吸聲費事俾爺爺聽到，有時候偷偷起身都未必睇得曬，因為部電視會壞壞地，周不時會變黑，我直頭要聽球賽而唔係睇球賽，但我依然樂此不疲，一有波睇就會嘗試去追，以前直播場次好少，愛隊列斯聯的球賽未必會播放，通常要撞到曼聯同阿仙奴呢d「大鱷」，電視台先會直播，所以作為一個球迷黎講，我睇波何止要偷偷摸摸，仲要等運到，個時候我都唔知點解自己咁傻要追直播睇，而我到宜家都仲係咁傻成日追直播睇，只不過唔再需要偷偷摸摸。
自從鐘意睇波，我真係變得鐘意足球，但凡同足球有關的東西我都好有興趣去follow，辛辛苦苦儲到零用錢即買件列斯聯波衫，雖然係翻版廉價球衣，我已經好滿足，而個時候好興「Winning Eleven」同「Football Manager」呢兩種足球game，我好鐘意玩，但冇乜機會玩，要星期六日偷去朋友屋企先玩到，我個陣幾渴望有部「PS」機，可惜礙於家境問題，我一直都冇辦法買到，哪怕我試過拎到全班第一名的佳績同幫校隊贏到區內足球比賽冠軍，都唔會打動到屋企人幫我買「PS」。
因為我住喺深圳，而當地有個深圳足球隊，04年係中超冠軍，於是我得閒都走去球場睇波，真係咖，現場睇波個feel又真係一流，就好似喺屋企睇DVD同去現場睇演唱會，又係兩種完全唔同的感覺，深圳個個球場好大，每次都好多人入場，D球迷係現場敲鑼打鼓拉曬Banner，氣氛非常好，而每次完場，我同班朋友都會偷偷走去更衣室，一睹球星風采，而我最鐘意的中國球星就係李建華，有次我地直頭睇到屋企喺度換衫，而李建華非但冇責怪我地，仲友善地叫我離開，而我就叫佢喺我件深圳波衫度簽名，佢都笑笑口口應承。睇左幾年，睇到深圳隊從強隊變成護級隊，而現場的球迷都冇乜減少到，票價仲係維持喺20蚊人仔一張飛。
中學開始，功課一下子多左好多，唯獨我依然冇減少踢波同睇波的時間，為左踢波同睇波，俾老師同屋企人鬧過無數次，但絲毫冇動搖我對足球的熱誠，因為我知道我成世人最大的成就就係鐘意足球，只有足球可以俾到我滿足感，亦係我生命中重要的寄託。
仲好記得第一次返工，挨到第一次出糧，同事叫我去唱K，我話唔喇，同事叫我去食飯，我話唔喇，我除左俾家用，仲開始儲錢，儲左幾個月，即刻走去買左部PSP同「Winning Eleven」光碟，1500幾蚊喺我世界黎講就等於係巨大數字，莫講話肉赤，係心痛，1500蚊要經過幾多次麵包加水當午餐換返黎，但我冇掙扎，就咁買左部PSP，為左玩「Winning Eleven」，我真係成副身家ALL in，點知買左先知係「中伏」，因為玩「Winning Eleven」，個兩粒可以滑動的圓形制就係關鍵，而PSP係得一個圓形制，變相我右手要去禁D「正方形」「三角形」「交叉」「圓形」制，成個feel唔同曬，玩得不能盡興，就好似我明明慣用腳係右腳，偏偏要用左腳控波，你不如直接叫我落場算吧喇！於是我賣左部PSP，再等幾個月，買人生中第一步智能手機HTC Desire，為既又係可以上網睇波，同玩「PES」，雖然手機版足球Game低能到唔知用幾多句「WTF」去形容，但好似我呢d「足球癡漢」，已經滿足。
到後黎搵到少少錢，先學人不停買波衫，但我唔係買新衫，而係上高登搵下有冇人放二手波衫，因為價錢平過出面，所以我買好多件車仔波衫當睡衣咁著，去踢波都可以著，非常開心。
霎眼廿三歲，事業飽受挫折，唯獨又係足球扶返我，正如90分鐘賽事，一日未完場，一日都唔好放棄，我從足球賽事當中學到的東西，遠勝於我以前埋頭讀書死記硬背的東西，奧巴馬當選總統我並不驚訝，但車路士殘陣可以奪得歐聯冠軍，呢件事情鼓勵我做人一定要有激情有熱血同埋唔好認輸，因為認輸，就真係輸曬。雖然窮並不是罪過，但窮會令人偶爾感到沮喪，私樓我可能永遠都買唔起，私家車我可能永遠買唔起，女朋友我應該係冇機會識到，但至少有足球陪伴，我一樣可以活得燦爛，做人最緊要係爭氣，窮並不可怕，可怕的是放棄自己，其實人生場波一日未完場，贏定輸都未知，有夢想原來比有銀紙更加重要。
當我鐘意足球個一刻開始，我已經賺左人生第一桶金，因為冇野比興趣更令人興奮。我夢想係帶住細妹同爹地媽咪去英國旅遊，而我就可以去斯坦福橋球場睇車路士比賽，去艾路蘭球場睇列斯聯比賽，我知道我一定可以實現。