（獨媒特約報導）雷靖梵，是一名80後社企創辦人。他的母親於三年前因癌症不幸離世，他其後於髮型鋪學師，並於兩年前在紅磡以母親之名成立社企「Queenie Henna」，以天然染料為癌症病人免費染髮。
2014年，他以南非作起點，獨自踏上單車之旅，沿途穿越三十多個國家後回港。在旅途中，雷靖梵曾於伊朗、新疆、西藏等沒有民主、自由及人權的地方生活。他表示，這些經歷皆讓他明白香港人擁有自由的可貴，「返到香港更加想去守護返自由、原本無嘅嘢就去爭取」。
經歷不平凡的6月後，雷靖梵決定以「守護自由」為口號，開始於土瓜灣進行社區工作，並考慮參選區議會土瓜灣北選區，當區區議員，是民建聯主席李慧琼。
他指政府強推修訂《逃犯條例》，是激發他落區的原因之一，「香港嘅自由權利一直被剝削，之前係網絡23條、甚至無得參選區議會，人大釋法DQ你、跟住又有咩逃犯條例。」
本來任職文員的雷靖梵，對香港民主自由抱有願景，但真正推動他落區的近因，是連登討論區上的一個帖子，「見到有個『填白區post』，自己唔鍾意建制派，唔想有議員自動當選。」他與連登網民組成團隊，計劃抗衡在「土瓜灣北」紮根20年的李慧琼。「如果真係選到，起碼李女士無咗超區（參選超級區議會的資格），（對李而言）係威脅」。
現屆九龍城區議會24個議席中，建制派佔20席，雷靖梵批評，這些議員並沒有盡本份做好地區工作。他指土瓜灣除旅遊巴氾濫外，亦有舊樓復修問題、垃圾衛生等問題，但區議員都沒有妥善處理，「（建制派）區選可能走出嚟話全力爭取，選到之後又係無咗影」。
他指自己近日頻頻落區，讓土瓜灣街坊認識自己，「主要俾街坊認識咗先，起碼俾佢哋知道，原來有個後生仔喺紅磡開咗間社企。之後會做入屋啲嘅嘢，例如幫老人家執屋、清潔、冷氣機維修等」。
他又認為，雖然李慧琼在土瓜灣北當了二十年區議員，但甚少與街坊接觸，「佢有幾可落區？係選嗰陣先出嚟。佢係有知名度，但有無親身接觸街坊、或者入屋？我相信少啲」。
近年土瓜灣成為內地旅行團購物熱點，旅遊巴「逼爆」當區，使居民怨聲載道。雷靖梵形容，旅遊巴問題一直未有改善，「我有落區諮詢，市民大部份覺得好擾民。有啲專門接待大陸人嘅鋪頭，都唔做港人生意，變咗掗住個鋪位」。他認為要改善問題就要立法規管，「（立法）限制旅遊巴唔可以停喺邊啲位，因為條路好窄，尤其是土北，都試過撞死兩個人。而家個情況日日都係泊廿幾架，無改善過。而且旅遊巴好大架，老人家行得慢，有時又未必睇燈。啲旅遊巴又有啲死位睇唔到人，你衝出去轉彎位咪撞死人，所以好危險，政府唔應該再濫發牌照畀專做旅行團嘅巴士。」
有網民發起於8月17日舉辦「光復紅土」遊行，要求政府處理內地團及旅遊巴對區內居民造成的滋擾。雷靖梵認同遊行有必要性，「帶出民怨，同埋居民受滋擾嘅訊息，提醒政府真係做嘢就要立法規管」。
2014年，雷靖梵以南非作起點，踏上單車之旅，曾於伊朗、阿富汗、新疆、西藏等沒有民主、自由及人權的地方生活。「我哋原本喺香港好簡單，你想講啲咩、想鬧共產黨都可以。但喺西藏，你試下鬧大陸，真係會死。伊朗又係，有啲宗教問題、男尊女卑。我喺首都德黑蘭住咗一個月，都體驗到無咗民主自由係幾咁慘」。他表示，這些經歷皆讓他明白香港人擁有自由的可貴，「返到香港更加想去守護返自由、原本無嘅嘢就去爭取。」「香港嘅自由權利一直被剝削，之前係網絡23條、甚至無得參選區議會，人大釋法DQ你、跟住又有咩逃犯條例」。
雷靖梵的落區口號，是「守護自由」。他坦言，落區企街站不時遇到反對聲音，有中年人士曾斥責他「破壞香港」。他認為土瓜灣始終是老人區，部份老人家可能只會看無綫電視或其他免費報紙，所接觸的資訊較為單一，自然會認為遊行都屬「搞亂香港」。但他指出，這些時候更需要雙方溝通，「我相信每個人都有善良一面。如果你坐低善意啲傾，有啲人真係可以傾到。我自己之前單車旅行，喺中國認識到好多國內人，你一嚟就同佢哋講政治就死硬。但你同佢friend咗之後，再講政治，其實有得傾」。
他認為，與老人家談政治需要「慢慢嚟」，「老年人有佢頑固嘅一面，但當你同佢有認識、已經係朋友嘅時候，雖然佢未必接受你諗法，但起碼唔會鬧你先。佢起碼知而家啲後生仔、出嚟抗爭嘅人諗咩，呢個最重要。」
除了與政見不同的人坐低溝通外，雷靖梵亦認為，要打破建制派壟斷區議會的局面，可在議會外推行公民教育，「（讓市民）知道建制、非建制派做緊啲咩，由淺入深，慢慢做。另外亦想吸納多啲新選民，希望後生出嚟投吓票，為自己社區爭取返」。
記者：陳康麒
部分相片由受訪者提供