今日早上花園街發生大火，造成九人死亡，三十人傷。唐唐即刻係下午宣佈押後造勢大會，表示「鑑於該宗重大慘劇，他覺得社會眼前首要工作是向死傷者家屬提出援助，安撫他們悲慟的心情。」然而據八方了解，呢個似乎係唐唐既落台階，目的就是要找一個冠冕堂皇的理由，避開星期四他自己一手製造出來既「造勢大會」政治炸彈。（兆基師生反對唐英年造勢勁爆聲明）
點解咁講？紀曉風今日在《信報》既專欄題為《唐英年借兆基創意書院 打民意反擊戰》講左少少，兆基唔係一個咁簡單既地方，佢雖然掛住四叔個牌頭，但係d學生關心社會，參與社運係呢幾年已經出曬名，菜園村、反高鐵、佔領中環都有兆基學生既身影。唐唐想係兆基搞造勢大會，用意相當明顯，就係要係一個年青人既地方，打造自己支持年青一代「發展」、支持創意產業既形象。有口痕友就話，上年唐唐係兆基度批評八十後再咁搞，會「車毀人亡」，所以就諗住係同一個地方企返起身，同年青人復和。
但世事邊有咁簡單。兆基書院固然有一班學生係度上堂，但兆基平時自己也會搞好多活動，也會借場俾人。上年唐唐發佈「車毀人亡」既偉論，雖然地點同樣都係兆基書院，但係個活動係 Roundtable 搞既，八方果日都係度，d出席者同嘉賓都好乖乖，企定定聽唐唐訓話。但係假如果日係換左一班積極參加社運既兆基學生在場，唐唐你邊有可能咁易講完你篇偉論。呢個對兆基認知既落差，就搞左個大頭佛出黎。據了解，今次係公關公司出面向兆基借場，兆基校方事前都唔知原來係用黎搞唐英年造勢大會，不少師生都係兩日前《明報》報導先知呢件事。當日 facebook 就已經熱血沸騰，不少人都在奔走相告唐唐要黎兆基既消息，更吹曬雞要係當日抗議。星期四造勢大會當日，同上年 Roundtable 星期六日借場搞活動完全係兩個世界，果日有大量兆基學生要返學，唔同星期六日成間學校既人流都可以控制。唐唐在校內搞造勢大會，學生要抗議，唔通學校同你係返學日清曬d學生出學校，或者係學校架曬鐵馬？再者，兆基書院地理上好難做保安，主要只有兩個出入口，停車更加只可以用延文禮士道，學校外面就係公眾地方，示威人士只要封住兩個出入口，唐唐就根本入唔到去造勢，或者要搞到個場面好肉酸，唔通你做特首候選人出席造勢大會，仲要call 曬成隊藍帽子開路俾你入去咁？好，就算俾你入到去，班學生係你身邊示威抗議，唐唐係避到避唔到，結果只會是造勢不成反出醜。
兆基創意書院師生，果然已準備好聯署信，更加貼埋上我地個網站，題目直接叫做《創意書院師生反對唐英年在創意書院辦「造勢」大會聲明》，內容也老實不客氣，直指造勢大會只係「做戲」，聲明話「一場虛假的「選舉」做戲大會，能借用學校場地堂而皇之地舉行，這顯然是對教育的嘲諷和傷害。」，更加要求唐唐「就以往的失言道歉（包括車毁人亡論、強化貧富懸殊、垃圾論等）」（八方補充，至少仲有「昂坪三碌拎」同埋「吊吊 fing」兩單。）呢篇聯署係短時間內就收集到大量師生聯署支持！
於是花園街大火就成為唐唐公關團隊的藉口，避過聽日呢場公關災難。facebook 上既人都老實不客氣，一人一句揭穿唐唐。羅永生最到肉，話「乜佢話喺花園街宣佈參選咩？唔通佢d貴人支持者會去救災？仲有，哀悼期會好耐，唔通佢會今日起停止所有競選活動？」陳景輝就話「同事一知道唐唐因花園街的火災，而延遲去兆基創意書院搞造勢大會，佢立即嘅反應係：乜兆基係花園街架咩？是日金句！」唐英年出黎開記者會，記者都已經心水清，問佢咁兒戲改日期時間，點信你仲有能力做特首，又追問唐唐係咪知衰揀錯場，唐唐當然一概唔理。唔好話八方認叻，打死我都唔信唐唐改期後既造勢大會會係返兆基搞，官方理由當然係「兆基未能借出場地」。改期當日，就請兆基學生數下校內有幾多間課室無人用囉！
以上文字，可以當八方小人之心，不過如果唐唐你真係想為花園街九條人命做d野，咁請佢聽下依排紅到唔紅，土地正義聯盟正街參選人王浩賢既 facebook 留言，佢話「花園街排檔大火令人難過，但更令人心寒的是，我查了在火災附近一幢唐樓的樓宇交易，都是近年購入的！明顯地花園街已出現被收購重建的意圖！ 而其實兩次火災後，任何有被波及的樓宇都會更容易在強拍時過關，取得售賣令。 同時在心理壓力下，居民就更易接受收購。排檔，在地產商的眼中，其實是阻礙重建發展潛力的石塊，可說是除之而後快。豪宅商場又怎會容得下小販? 警方每次對於樓宇收購時出現的火警都是不了了之，我們需要運用民間力量，進行調查！」
唐英年，這就是地產霸權，這就是幫助發展商壓迫小業主的《強拍條例》既惡果呀！