人民力量發起的立法會替補機制拉布戰，在6月1日已經結束。面書上關於拉布戰的討論就好似曾鈺成剪布咁，一剪就無左，話咁快就俾六四和面書河蟹事件蓋過晒。不過到左今日6月19日，其實布仲未拉完，今日財委會會議由上星期五開會22小時，都仍未完成審議梁振英的「五司十四局」提議。所以話呢，面書世界不可盡信。仲有十幾日就七一國家主席胡錦濤來港，梁振英究竟可唔可齊曬五司十四局人選向胡宣誓就任？
梁振英一聲唔講就話每年要多七千幾萬開多一堆政治問責職位，經歷左替補機制既拉布戰，呢場唔係拉布既「五司十四局」拉布戰已經開打十幾日，戰場跨越幾個事務委員會、財委會及立法會大會。人力一早預告會提出至少五百條問題同埋幾百項動議，民主黨也在網上收集問題加入戰線。比起替補機制，五司十四局的拉布戰戰線更長，投入的議員更多。
暫時個社會形勢都 OK，建制派當然話係浪費時間，之不過都有唔少人唔妥梁振英，期間李旺陽事件爆發，CY 又要等中聯辦出聲後至敢回應，威信盡失。在「五司十四局」一事上連爆多個人選都是深紅，又有不少董建華時代舊電池，未上台先輸氣勢。
就係呢個形勢，泛民先可以同人力係呢件事上齊心拉布。八方最怕香港人善忘，就講返替補機制，香港人去年為左反替補，七一有廿二萬人上街，本來死都唔肯做諮詢既林公公就只好做下諮詢扮下野啦，最後就出左而家呢個「辭職議員半年內不得參選」既所謂「出缺機制」喇。之不過歷經區議會選舉慘敗的泛民，道氣仲未返黎，瞻前顧後。當時就有政黨中人同八方講，有唔少唔參加拉布既泛民議員覺得好委屈，佢地認為新方案無影響五區公投，又覺得應該等到網絡廿三條先拉布，又話拉布係一項風險高的行動。至於人力與泛民的長期嫌隙當然都有關係啦，你又話我叫你唔洗參與，你又話我無邀請你，你又想食曬個運動，你又驚俾人牽住走。最終泛民在立法會審議替補機制時缺席就算，由得人民力量及社民連三位議員堅持。
到六四廿萬人迫爆維園，泛民既戰鬥力先返黎。到目前為止五司十四局似乎既命運似乎都危危乎。聽日復會既立法會大會，本來預左四、五、一及二開四日會，但係財委會未搞掂，大會又要讓路予財委會。搞得財委會黎，本來要上大會既野又唔夠時間搞。
八方睇到今日，就覺得無論人力、泛民同民間團體應該都要係今次拉布戰學到野。運動無話一定係邊個既專利，泛民今次有份的拉布戰就好好睇睇。泛民與民間團體雖然與人力差唔多已經去到各行各路的階段，但係都唔應該一見人力就走夾唔抖，因人廢言。毛主席都叫大家分清主要敵人同次要敵人，搞運動就係要團結大多數麻，一個人的力量永遠比三個人少。相信經過今次之後，先後參與兩次的拉布戰的議員感受最深。
八方講多一個替補機制拉布戰時在場外集會既小插曲。拉布戰到第三個星期，主搞既人力已經相當乏力，希望尋求議會內外的支持。當時立法會外其實有兩場集會，一邊是人力集會，一邊則是民間團體。雖然兩邊曾經傾過一齊搞，但民間團體雖然黎支持，對人力始終有擔心，人力方面則擔心突出唔到人力角色，最終佢地都決定分開搞。個故事結局係點呢，集會凌晨曾鈺成宣佈剪布，人力在暫停會議期間就開始執野，有些人力粉絲早上黎到摸門釘，仲當場對住參與民間團體集會的朋友大嘆人力、選民力量、熱血公民和普羅政治學苑之間既矛盾，搞到人力集會的堅持都不及民間團體。
所謂泛民及民間團體與人力之間既矛盾，係咪真係要搞到咁大？八方當晚也在場，有一幕人力議員黃毓民深夜返回議會，走到民間團體集會這邊，不少之前同毓民鬧曬交既民團成員及社民連成員也向毓民報以掌聲鼓勵，毓民拿咪，都講話要不論泛民、民間團體既朋友也要團結一致，打好這場拉布戰。八方就希望兩邊都好好記住這一幕啦。