八方八卦，幾成本質。除o左八卦社運時事，各界（至少係男女二界）生活如何，都想多知兩錢。近年坊間有後輟holic一樣，唔淨止alcoholic即酗酒者，購物狂可以叫shopaholic，甚至有個泰國粉絲網站，以thaiaholic命名。講o左三個holic，都係想帶出一個字：shoeholic，或者shoeaholic，鞋癡。八方以為，唔係買五六十對鞋或以上，先可以叫shoeaholic，有返十對八對鞋，又對鞋比較講究，都已經叫係。之不過，shoeaholic呢個字，往往係套落有多對女裝高跟鞋o既女子身上，或者係因為 ，佢o地係鞋業o既大客，時尚界亦同佢o地互動頻繁。
社運同批判文藝朋友似乎好難做到shoeaholic，亦少見著高跟鞋，原因可能係（一）買咁多鞋，未必對對應買則買，有過度消費之嫌，從環保、反資兩路睇都唔妥；（二）老老實實，兩界朋友好少求高收入，或者未必能夠高收入，買鞋都係開銷，未必可以貴買；（三）唔計遊行抗爭平底鞋好似有利少少，成班同志都冇乜人著開，唔多唔少都有o的規範，就算平價靚鞋有，都係平底算。睇落社運、批判文藝同高跟鞋唔太拉到關係，不過兩個幾月前華語紀錄片節選放，重得埋短片組冠軍o既《我愛高跟鞋》，就引來社運同批判文藝界同其友好o既少少回響。岔開一筆，兩年前（即係2009啦）o既華語紀錄片節，因為選放一部拍攝手法同訪問倫理o既《麥收》，掀起筆戰，同埋重有社運朋友放映時抗議。有關討論，可以睇呢度。
八方睇到o既討論，係由注重動物權益o既張婉雯開始。佢貼o左《我》片o既預告，同時話片中主角之一o既牛仔皮高跟鞋，背後「就是殘忍與虐殺」。有食素，或／同埋支持動物權益o既朋友，例如麥海珊（阿晨），就支持兼勸大家唔好再著皮鞋用皮具，著鞋就著vegan鞋。而協助工人爭權多年o既蘇湘，就同張婉雯探討下係咪戒o左皮鞋就夠，直指既有o既生產同消費模式：「無論是用動物皮，還是用人造皮，甚至你只穿布鞋吧，我們都沒有脫出這個殘酷的圈圈。」「人與動物的被剝削不是對立的，但單單救助任何一方，都不代表能夠改變這個剝削的體制。」
做環保農漁線o既自由身記者陳曉蕾，亦有說話講。佢都係放重心o係小牛皮高跟鞋，而佢寫前寫後都諗o左唔少，就係界線同平衡：例如係咪唔殺一歲以下o既動物？但一歲或以上點解又可以殺？本來可以將人類同動物o既需要平衡，但已經做唔到，唯有寫出來，等大家揀。簡樸生活更好，都唔可以令所有人都咁過活。然後，就有一串關於服裝同浪費o既討論。
俞若玫就o係陳志華（孤草）o既貼片度，話鍾意導演所揀o既視覺語言，「不霸氣，而帶批判，不下壓，有想像，無答案，讓觀眾有自己的視點」，同埋有好強o既性別視野。孤草就話「影片充滿女性導演的敏感觀察。最後從花枝招展的模特兒，再接回屠場的小牛，凝視著牠的眼睛，非常溫柔卻也讓人難過。」至於半農半讀o既阿野，就整o左篇筆記〈廠佬的心願，或難以啟齒的自由〉賣俾《信報》，將工廠同全球化下o既處境，同全球化下話耕田唔知幾自由o既農夫同論一番。
至於一眾香港shoeaholics，對呢部片又有乜o野講？嗯，八方都試過摷，但唔好意思，重未搵到；難道除o左Michael Moore或《Super Size Me》或時裝界紀錄片，紀錄片都係同時尚界有大段距離？