前兩日，有網友問八方，點解民主黨同公民黨係版權問題到咁「摺」，湯家驊搞到出黎做晒醜人。八方為此四出打聽，版權呢單野牽涉嘅利益實在太大，唔單止版權持有人日日向立法會議員施壓，原來連美國政府都出埋聲叫香港政府快啲過，如果唔係，香港做唔到數碼科技中心。但群情兇湧，立法會選舉將至，連建制大黨都話可以慢慢過，搞到幾大版權持有人協會要放軟態度，唔反對豁免政治諷 (惡搞﹣satire) 的刑責嘅修訂。
其實呢次版修訂，主要係抄美國嘅 digital millennium copyright act，最大嘅目的係俾荷里活、SONY、EMI等電影音樂版權商能享有未來所有科技傳送的權利 (technology neutral communication rights)，所以最大的游說力量來自呢啲版權持有人代理，而佢地唔理政府會唔會用呢個條例來打壓網民，總之利益最緊要。上年七月，當網民係立法會要求豁免政治諷刺作品嘅刑事責任，佢地嘅代表聲大大反對，仲話：「若果改咗首歌搞到入唔到大陸市場點算？」
結果，政府就用「先通過再研究豁免」作為游說立法會議員嘅招數，但呢招又點可能擺平網民呢？年初，政府諮詢完法律界意見後，做咗幾個澄清同讓步，包括寫明刑事責任要「超乎輕微經濟損害」、「足以取代原來作品的複制」，並強調「今日網上不構成刑責的，立法後亦不會」。
但係，自從隻狼爆冷做咗特首後，網絡廿三條嘅恐慌突然加劇，連文化界同創作人都走出來話政府未諮詢佢地，反對立法。又遇上政府換屆，狼營最關心嘅係政府架構，唔覺得版權好迫切，而立法會選舉在即，連民建聯都驚要孭鑊，話唔介意一拖再拖。
面對住呢個殘局，最急係以美國為首嘅版權持有人，除咗日日嘈班立法會議員外，仲出動美國政府去游說特區政府，話若果條例一拖再拖，香港會失去做亞洲創意科技中心嘅先機。聽到呢番說話，八方心諗，國內又盗版又山寨，又唔見佢地發展唔到創意科技？
同八方吹水嘅朋友，見到我斜起對眼，估到我唔 buy 呢種講法，同我解釋，好多跨國互聯網公司嘅法律顧問，都要求佢地要喺有互聯網安全港 (safe harbour)嘅地方發展，如果無安全港，連 Google 將軍澳嘅數據中心計劃都可能拉倒！。
八方係百份百嘅網民，「科技中立傳送權」、「互聯網服務提供者安全港」嘅立法，都限制咗網民消費權力，全世界都有人反，香港仲加多個網絡廿三條嘅恐嚇，唔白紙黑字寫明豁免政治諷刺嘅刑責，無可能哽得落。
喺呢個膠著狀態下，版權持有人似乎亦開始明白，總要有一方讓步先至可以化解僵局，傳出唔會反對修訂中加入豁免政治諷刺刑責。
如果真係咁嘅話，依家個波又番到特區政府手上，究竟係改定唔改？如果改，相信大部份網民會舒一口氣。如果唔改，好明顯係有政治考慮。
不過，八方提醒大家，即使加入豁免，一旦修訂通過，創作人日後同版權持有人簽約，一定要睇清楚條款，盡可能唔好賣斷自己嘅作品，如果唔係，第二日你自己嘅作品，都唔可以同粉絲分享。更重要嘅係，網民同新媒體創作人，要組織起來，加入未來的安全港實務守則諮詢，爭取一個有利網民的機制，並商討民間面對刪文機制嘅對策。