以下是筆者的親身經歷：
在的士上：
司機：「嗱，我就政治中立嘅，但係佔中阻住條街影響到我哋冇飯開就唔得。」
筆：「點影響發呢？」
司機：「阻住條街搞到我要兜路行囉。」
筆：「兜路行唔係賺多咗錢咩？」
司機：「er...咁你影響到其他人做生意嘛！」
筆：「但係你哋夜間的士唔係應該多咗好多人搭咩？夜晚咁多佔中人番屋企。」
司機：「er...（大概五秒後）總之攪到人冇飯開就唔好啦！」
筆：「哦……」
之後二十分鐘的路程也沒有對話了。
另一次親身經歷:
在巴士上，一位陌生婦人正在高談闊論。
婦人：「黃之鋒收美國好多錢㗎，攪亂個香港之後就走去美國嘆世界。」
筆者搭訕 :「太太，你點知㗎？」
婦人：「我有朋友話比我聽嘅。」
筆：「咁堅？」
婦人：「梗係啦，佢唔係收咗錢，點會走出嚟咁大聲講嘢吖。」
筆：「太太，咁又唔係個個都要收錢先上街嘅。」
婦人：「你都傻嘅，冇錢上街嚟做乜呀？你試下唔比錢我睇下我會唔會同你上街吖，貪個太陽唔夠曬呀？」
筆：「學生係爭取民主自由囉。」
婦人：「民主自由？唔洗食呀？你班友阻住我搵食，我攞把刀落去斬死晒你哋都得呀！」
筆：「咁惡？」
婦人：「咩呀！香港有言論自由嘅！吹咩！」
筆：「哦……」
（言論自由不正是學生爭取的嗎？）
兩次的經歷，筆者都沒有再繼續辯論下去，原因不是筆者認同了別人的想法，而是筆者知道世界上有一種人，叫做 Storven ，中文譯作『食痾瞓』。
根據馬斯洛人類需求五層次理論（Maslow's Hierarchy of Needs）：食，痾，瞓是屬於最底層的『生活生理上的需要』（Physiological needs）層次，而民主與自由是屬於較高的『尊重的需要』（Esteem）和『自我成就的需要』（Self-actualization）的層次。
簡單來說，每個人在人生中追求的都可以不同，有人說他要的是一碗飯，有人說是金錢和權力，而有些人卻說是尊重每一個人的生命，每一個人天生便應該有的選擇權和自由。
最後，筆者記得有次在動物園裡聽到一位小孩問了爸爸一個問題：
「啲動物每日喺度有乜嘢做㗎？」
小孩的爸爸想了一會
「都係食吓嘢，四圍走走，之後痾番出嚟，跟住咪瞓囉。」
「咁佢哋咪好悶囉？」
「阿仔，佢哋唔識諗嘢㗎。」
網路圖源:
http://en.wikipedia.org/wiki/Maslow's_hierarchy_of_needs