作者為學民思潮義工
擺咗咁多次街站，但都唔及今日嘅咁難忘。開站無耐，已經有便衣（應該係）嚟同我地講有藍絲係附近，原本都覺得冇咩野，畢竟次次開站都總會有啲同我地不同意見嘅人嚟鬧吓我地搞亂香港、問候吓我地啲屋企人，一直到有人播改版嘅《祝壽歌》，意圖騷擾我地嗌咪。
老老實實，我覺得大家有唔同意見好正常，你唔贊同我地做緊嘅野冇問題架喎，每個人嘅價值唔同睇法唔同，你覺得我地佔領影響到你地搞到你地要早15分鐘出門口係罪大惡極所以要成班 auntie uncle 嚟鬧吓我地班細佬，希望我地「回頭是岸」it's okay。
但係，你地班auntie uncle想我地「回頭是岸」係咪都應該搵番啲「道理」嚟說服我地，用文明嘅方法表達你地嘅意見？！
係同學嗌咪嘅時候，auntie 帶哂漁夫帽黑超同口罩飛撲埋同學度一手搶咪一手搶大聲公，然後又話學生連回鄉證英文係咩都唔知we shame on you係國際笑話，有個被稱為「博士」嘅uncle係度講咩再生醫學、納米醫學得出嚟嘅結論係佔領人士腦部痴咗筋。
仲有個uncle一路係度講日本侵華果陣殺咗三百幾萬人但就一路話我地係慰安婦，三個鐘嘅時間有太多令人啼笑皆非嘅說話不能盡錄，我想講嘅係，auntie uncle你地唔係真係以為係我地擺站嘅時候你地講埋啲咁嘅野就代表你地有道理呀？
除咗人身攻擊同抹黑之外我聽唔到有任何道理、理由去叫我地聽你地講，成日就叫我地番屋企，你估我地唔想番咩，瞓街好好玩好舒服咩。你地又俾唔到個理由我說服我番屋企，淨係識係度人身攻擊又鬼用咩。人身攻擊有用嘅話我地都唔洗瞓街啦。其實我最想講嘅就係，我接受亦尊重你地有唔同嘅意見，我屋企人個個都係藍絲嚟添，但請你地用道理嚟說服我地，繼續人身攻擊只會顯得你地嘅理據不足。
嚟緊嘅街站我相信都會再次遇到呢啲情況，但我地會繼續保持理性擺我地嘅站派我地嘅單張，堅持我地嘅信念。 :)