回想半年前9 28，當時係茶餐廳邊睇互動新聞台邊食中午飯。我仲呼籲齊聲破口大罵689嘅食客同我一齊出去，結果幾個阿叔當然無跟我去出。
當時金鐘地鐵出口已封，我就係灣仔落車，出去演藝學院對出匯合幾個朋友。見金鐘有煙霧出，無眼罩，唯有問身邊同行，借保鮮紙包住眼鏡頂住，著晒便利雨衣戴口罩戒備催淚彈。
當催淚彈係隊頭爆發，一眾人就向銅鑼灣後退。一直進進退退到夜晚，有左翼組織收到消息會開槍鎮壓，呼籲群眾暫時撤離，粗略估計有一半人離開。我與同伴們怕金鐘留守者因紅十字會一帶無人會被防暴黑警包圍而決定留低。
直到11點左右，有傳黑警會進入演藝學院內掃蕩，一行人就過去幫手將物資運去灣仔分域街一帶。
當晚係海富中心一帶留守到天光，印象最深刻，係見到防暴黑警手握長盾警棍，兩邊包抄天橋上示威者，但示威者堅決坐低唔走，係遠處目睹嘅有人叫口號聲援，有人立即跑去天橋。最後防暴黑警暫時撤退，歡呼聲震耳欲聾。
凌晨一眾人係灣仔食潮州粉麵，大家睇店內電視，都驚訝CCTVB竟然會不停播催淚彈、煙霧迷漫嘅畫面，播黑警拉開眼罩噴胡椒噴霧等鏡頭。正正係呢D畫面先激起民怨，有最少20萬人冒生命危險佔領金鐘一帶。
半年後嘅今天，當時係佔領區互相照應嘅同伴到今日仲有交住，一同出席社運活動。
我唔老土咁TAG 邊個，衷心感謝咁多位戰友嘅照顧同陪伴，無你地我無可能出去佔領區咁密。
當灰心喪氣嘅時候，請大家回想半年前嘅今天，點解要瞓馬路?
勿忘初衷！
繼續同權貴抗爭，爭取民主自由！