圖：灰記客
原文為7月4日港台《香港家書》錄音
盧少蘭婆婆：
雨傘運動期間，見到妳坐輪椅到金鐘佔領區分享領匯私有化嘅各種問題，我好感動。諗起妳十年前，妳推住比自己仲老嘅婆婆上街反對領匯上市，妳同我地年青人講，妳係「老人權益中心」最年輕嘅，妳地老友記行出來係為年輕人爭取公義。十年後，妳從推輪椅到坐輪椅，身體可能差左，但堅持盡公民責任，爭取公義之心，仍然勇猛，仍然非常感動遇到妳嘅市民。
我想同您分享我有份發起嘅新社區運動，叫「社區公民約章」運動。七一遊行當日，社區公民約章嘅街站收到一千名市民嘅簽署，承諾做香港嘅社區公民。
社區公民約章唔係一般嘅聯署，係市民對自己嘅一種公開承諾，承諾自己社區自己救，社區公民唔需要議員代表我，亦唔依賴議員為我爭取乜乜乜。社區公民見到社區問題或者潛力，自發嘅埋堆出聲，用自己嘅力量改善社區環境，監察區議會，以參與民主精神，給合民主民生，相信民主可以當飯食。譬如，倡議人之一嘅戴耀庭教授喺71街站建議，同一區有一百位社區公民簽署，就可以埋班開社區公民大會，一起商討社區問題同發展前景。點改善公共空間避免被私有化，點支持小舖頭同社區企業，點推動廚餘回收，點舊物回收再分比有需要嘅街坊等等。當然，社區公民一定會密切監察區議會同區議員嘅表現，要求重大社區建設一定要開「公民商討大會」，以參與民主方式，一起商討決定。「公民商討大會」亦係學習民主實踐嘅地方，居民學習開會，學習聆聽，學習為他人著想，學習妥協同建立共識。
如果有社區公民積極監察區議會，我相信而家一億元音樂噴泉，避唔到雨嘅避雨亭等白象工程就唔會出現。十年前，如果有更多社區公民陪你一起阻止領匯私有化，而家就唔會舖租貴到乜小店都死晒，居民乜野都買唔起。
社區公民唔係新嘅概念，喺西方國家，六十年代已經興起。個陣時都係居民保衛社區運動，居民阻止各種不民主嘅逼遷重建同發展計劃，以推土機方式消滅城市社區同農村。近廿年，係我長大嘅馬來西亞，同我讀大學嘅台灣，早有社區公民嘅運動。喺台灣嘅名稱是「社區營造」，透過社區公民埋堆嘅力量，建立互相信任嘅社區認同感，一起做社區計劃，改善社區生活環境，重建社區文化歷史，提高社區就業機會。台灣從社區抗爭地產霸權，到社區營造優良嘅生活環境，已有廿年歷史，培養左無數嘅社區公民。自已社區自己救之餘，一啲社區公民會積極投票同參選，承諾做進步嘅里長同市議員，支持社區公民嘅各種社區營造計劃。
我有一社區計劃很想邀請您參與，計劃名稱叫「老少跨代學習中心」。呢排，社區養老同托兒嘅設施嚴重不足，與其分開兩個中心，不如老少都聚埋同一中心。老人家可以照顧小朋友，講故仔比佢聽; 小朋友亦可以瞭解關心老人家，同時學習老化係自然過程。其實，香港嘅社區公民，可以一起同政府申請殺左嘅學校，成立老少中心，到時就可以邀請妳同老友記一起搞。
我哋社區需要好似你咁嘅社區公民，鼓勵更多街坊關心公共事務，不但會自己社區自己救，亦唔會輕意被蛇齋餅糉收買。最好係自己參選埋一份，推動區議會民主化。
少蘭婆婆，您同老友記追求公義之心，係鼓勵我本土化，學好廣東話，同參加社區運動嘅動力。後政改同區選期間，祝福您同老友記，身體健康，龍馬精神，我哋街頭見！
陳允中
2015年7月4日