見到有關在連儂牆用粉筆畫花的十四歲女生，竟然被送往女童院的新聞，（後來證實係屯門兒童及青少年院，網址）老實講，真係驚訝左足足三十分鐘或以上。
係呢一刻，我諗到嘅，就係係市民對政府已經咁失望之際，竟然仲有咁嘅事發生，呢個政府已經癡左線，足足癡足咁耐。見到市民咁不滿，係可以長期以極度厚顏無恥嘅態度，置民意於不理，去到極其不合理嘅程度。
我諗，呢個係『沒有最荒謬，只有更荒謬』嘅極佳例子。
而呢件事，亦令我地醒覺，呢一個政府，想要製造白色恐怖，可以話係無所不用其極。利用要『保護』個女生作理由，將佢同家人分離，完全同《保護兒童及少年條例》（香港法例第213章）（Protection of Children and Juveniles Ordinance）原來設立嘅原則同目的背道而馳。 【更多有關PCJO 細節，可到此】
咁樣做，保護緊嘅，真係個女生？定係係警方背後嘅政府呢？
司法制度，原來係市民係壓迫中，能夠尋求嘅最後一絲曙光。呢件事後，我地唯有自求多福，希望香港嘅司法制度，能夠承繼公平公義公正嘅原則，作為我地嘅最後援兵。
最後，親愛嘅政府啊，無所不用其極地製造白色恐怖，嚇下人可能係有點點兒功效。
但係，過左咁耐，你仲唔明白？你每行錯一步，香港人都看在眼內。你再咁落去，咪會再激起民憤囉。
你繼續一棍棍咁毆落黎啦，我地一棍棍咁擋。
要記住，
物極，係會必反架。
呢個道理，一早係928見到啦，親愛嘅政府，
你唔係唔明啊嗎？
<恆>