社民連特別會員大會，終於完成，一眾花生友都係靜坐電腦前等結果。但對於社民連黎講，呢個肯定只是個開始，以八方多年經驗，一眾花生友一定要買多幾大袋，準備繼續大食特食矣。未來幾個月，至少仲有三個看點可以大食花生：
花生位一：毓民「太上皇」地位動搖？
社民連自零六年成立以來，一直唯「幫主」馬首是瞻，違其心意者必然無好下場，由勞永樂到去年退黨五人組就知啦。今年社民連雖然已經換屆，但係「老幫主」依然舉足輕重，睇睇已請辭的秘書長季詩傑既下場。今次「倒閣派」玩到咁大，「老幫主」都咪話唔關佢事，事關「倒閣派」無論在面書及人網既留言，都不乏「毓民話乜毓民話物」既講法。前社民連行委陳士齊齋sir 同Ken 仔就拍左條片，在片中陳士齊就直指「老幫主」係網台大鬧現任行委的行為，激化左黨內矛盾，十分唔岩。陳士齊更呼籲「前主席珍惜自己的名譽，好好利用自己把口。」連馬草泥口中，長毛的「小職員」 Penny，也寫左篇《是誰由內部攻破堡壘》，直指毓民的不是。八方好奇既係，隨著有毓民背書的「倒閣派」昨日一戰失敗，毓民既「太上皇」地位會唔會都坐唔穩？
花生位二：香港人網
人網一直以來，都可以話係比社民連更官方既平台，討論區入面既「黃毓民政評」，更加係社民連既風向駝，入去一睇，基本上乜野「黨既機密」都會睇到。但係係今次「倒閣」呢件事度，就出現左一股反人網既聲音，Paulymh 指「黃毓民政評」版主，至少封殺左十幾位反對倒閣者既戶口，令到塊版既聲音一面倒支持「倒閣」，激化曬矛盾。對於曾被商台封咪既毓民黎講，又不知作何想法呢？連林忌都忍唔住出聲，質問五年前圍攻黃世澤果班人究竟去曬邊度。八方好想睇睇「沒有人網，哪有社民」既狀況仲會唔會繼續落去。
花生位三：馬草泥仲想代表社民連出選？
琴日係會大敗北之後，《一零憲章》雖然有份聲明，話《民主勝利！輸得漂亮，嬴了民心！》，有四成人支持佢地。但係八方好想問既係，馬草泥係呢一戰度，將六成推向自己既對立面，佢日後想代表社民連出戰區議會同立法會，又點樣爭取黨內支持？出年十一月就係區議會選舉，時間無多，八方也好想睇睇馬草泥點樣在短時間內扭轉呢個劣勢。
講返個會大，在會大召開前，已經足夠令八方同一眾花生友興奮，先係季詩傑辭職，到底係陶派俾倒閣派既下台階，定係季生自己心灰意冷或為「顧全大局」（佢話自己都唔知自己有咩錯），就不得而知了。同時間，另一方既李偉儀就竟然走左去報警，話行委黃浩銘同唐婉清恐嚇佢，八方睇左佢篇聲明幾次，又睇過之前條片，都唔明解佢要告人啲乜，可能係八方領悟力低，所以都幾好奇警察會點處理。八方仲有唔明既係，投訴人乜唔係成日都話「警權過大」咩？
至於會大既投票結果，三條議案同投票結果分別係：
1.「成立地區支部或地區服務處」，結果係：
贊成：156
反對：93
棄權：6
白票：1
廢票：1
2. 「社會民主連線參與泛民主派區議會選舉協調機制」，結果係：
贊成：211
反對：29
棄權：26
白票：0
廢票：3
3. 「解散行政委員會內閣及重選」，結果係：
贊成：111
反對：170
棄權：10
白票：10
廢票：1
據說出席既會員大致上都有近三百人，亦都有人嚟到投左票就走。由於社記會員冇過冷河制度，有人喺會大之前兩星期成為會員，亦都即刻有投票權可以投票，不過咁樣對邊一邊有利，八方就唔知喇。至於社記三位立法會議員，毓民同大舊就冇出現，長毛有出現但係就冇表態，主要都係處理規程問題，咁又係，咁既時勢順得哥情失嫂意，而且毓民暗撐馬派就係人都知，大舊又同毓民同一陣線，長毛係社記最後一個中立而有公信力既大佬，呢一刻都係唔表態為妙。
如果單純是選票論勝負，今次就梗現內閣（陶派）勝利，倒閣派失派，雙方得票大概係六四之比。而特別一提，第二項議案之所以大比數通過，係因為算係重新確認7月25日通過既「決議文」，所以冇乜大爭拗就過左。而另外兩個議案就真係拗手瓜，比例亦都好一致，今次晒冷似乎都反映左雙方既動員力。陶派雖然勝出，但係其實唔多穩陣，而面對馬派繼續出招，真係要沉著應戰了。
依家無論係社民連中人定係黨外花生友，都喺度睇緊馬派仲有冇招出。講真，八方作為花生友，見到社民連搞成咁既樣，都覺得難受。黨爭還黨爭，都要尊重民主制度同佢產生既結果，講實力都要講風度，如果唔係盞越來越多人對社民連失望，到時贏左黨爭，輸左民心，咁就真係唔知爭嚟做乜了。