[草根.行動.媒體]http://grassmediaction.wordpress.com
文：戴眼識文
方向報又係到扮關心基層實幫人拉票啦。
單看題目：「未來五年公屋供應不足」，以為關係到民生睇多兩眼。點知，第一段，個建制派議員王國興就話，唔夠地係因為居民反對。咁你一個立法會議員，在立法會發言，見到政府做事做得慢，就算不督促政府，都可以建議政府做啲野啦，對住政府鬧市民，咁政府係咪唔洗做？咁你在立法會收錢做議員，日日鬧市民你咪好著數？
就算你話東北反對，先不論拆你屋起公屋你肯不肯，就算東北村民肯，都包不了政府所落後的所有咁多萬個單位，咁其他地方的居民又做乜反對？他們是否合理？不見報導喎。
最搞笑係，個報導又引述政府話，原來政府根本有野可以做，就是「精簡規劃及地政程序及放寬地積比」，只是唔知點解等左兩三年先至來做呢呵？無報導喎。
仲有，唔知點解政府土地儲備就死都不用，一定要「透過土地供應督導委員會覓地」？無報導喎。
最後果段，小標題是「42幅地開始改劃建屋」，以為今次劏房波有些建樹啦，睇真啲，街坊千萬不要只看標題，原來42幅地中只有五成七是公營房屋，其他就只是做「住宅用途」。大佬，住宅可以是豪宅喎，咁之前果啲「放寬地積比」會否變相方便啲地產商再起高啲，再推高樓價，殘害小市民？ 咁政府有無諗住防止呢？又無報導喎。
成篇報導，好似好順暢，但疑點處處又無跟進，唯一清楚就係寫到王國興和劏房波好似好有建樹，大家街坊真係要小心語言偽術！