話說喺2005年4月29日，曼聯喺官方網站宣稱，已經成功收購來自挪威球會利恩既米基爾，轉會費冇講到，只話簽約四年；當時米基爾仲未透過任何大賽而成名，本身呢單野唔多人關注，點知與此同時車路士都宣佈同米基爾經理人達成協議，利恩隨即否認。
當事人米基爾急急腳開記者會澄清，聲稱自己好開心可以加盟曼聯，仲拎住件印住21號既曼聯波衫喺度證明自己已經係曼聯球員。
好喇，如果話車仔擺錯烏龍亂up24，咁呢單野自然不了了之，最多咪俾人笑啫，而喺205月11日挪威杯一場比賽進行時，米基爾突然「潛水」，引起挪威傳媒大肆報道，利恩主席聲稱米基爾俾車路士「標参」，曼聯亦隨即發明相同聲明，指控車仔有份「夾走」米基爾。
好地地一次轉會，講到「標参」咁誇張，外國傳媒最叻無風不起浪，開始寫故事喇，吹得就吹，吹到樹葉砸死人，成個池塘既水都俾佢抽曬。
後黎米基爾同佢經理人被發現喺倫敦出現，米基爾喺酒店接受傳媒訪問，稱曼聯喺威逼佢簽約，當時佢經理人都唔喺度，疑似有人大石砸死蟹，個事實係佢只想加盟車路士。
咁曼聯一聽到，即去國際足協投訴車路士同米基爾兩位經理人夾埋唱雙簧喇，而且指出其中一位經理人有違規前科，呢單指控要到8月先得出回應，國籍足協表示冇證據可以起訴車仔。
呢度有一個幾令我疑惑既地方，點解曼聯同車仔會搶米基爾呢個未有名氣既球員？
提起米基爾，好多人知道佢係05年世青杯銀球獎得主，美斯就係該屆金球獎得主，但2005年U20世界盃足球賽喺荷蘭舉行，時間係於2005年6月10日至7月2日，即曼聯同車仔異口同聲話簽佐米基爾個一日，喺世青杯賽事之前，我當兩間球會既球探都獨具慧眼，相中米基爾，但有冇必要為左一個球員搞到要互相反面，仲要互相指責對方，陰謀論四起？
當然，唔排除係米基爾經理人從中搞事，米基爾有兩個經理人，兩個經理人都分途出擊搵老細，結果「撞車」搞出呢單大頭佛都唔出奇，但車路士同曼聯兩個球會都表露出寸土不讓既態度，令成件事複雜太多。
最奇情係，車仔同曼聯既關係本來好似「狗咬狗骨」，自米基爾喺06年如願加盟車仔後，車仔唔單只支付400萬英鎊俾利恩，仲順手俾1200萬英鎊益曼聯，嚴格黎講，米基爾使佐車仔1600萬英鎊，但其中1200萬英鎊去佐曼聯度……係車仔有錢得濟定有內幕，至今冇人知道發生乜事，個1200萬英鎊唔知點解就咁俾佐曼聯，成件事上曼聯係無本生利，利恩係幫曼聯賺佐1200萬英鎊，車仔「成舊水魚咁俾人劏開幾舊」。
而精明費sir，就用車仔「送既」呢筆錢再補多少少，買佐防中卡域克返黎，而卡域克從此平步青雲，晉升世界一流防中行列。
如果你問我，米基爾值唔值得，我會覺得係值得既，但呢個價錢係當時黎講係唔多合理，有關米基爾，我之後會專門寫篇文章將佢。
PS：原本係攻擊中場既米基爾，俾摩連奴改造成防守中場，類似費sir將阿倫史密夫同安達臣改成防中咁，但米基爾既改造成功好多。
支持筆下留情·足球說歷史，請like facebook page
https://www.facebook.com/footballtellhistory
你的支持，我的動力