【獨媒報導】宜嘉掛靴!標準流浪下午在旺角場的賽馬會菁英盃決賽,以1:0贏傑志封王,為賽前已宣布戰畢今仗便掛靴的隊長林嘉緯、副隊長盧均宜,作完美告別。在賽後,盧均宜不失佻皮本色,笑言林嘉緯竟無多謝自己:「好嬲佢!點解我踢咗咁耐,佢都無同我講一句多謝,我宜家多謝你,咁多年一齊共渡患難,一齊攞獎盃,一齊經歷過好多嘢,喺度衷心多謝佢,希望所有嘅球迷都會繼續支持香港足球。」
近年家傳戶曉本地球員 球迷拍手致意
標準流浪今場憑伊巴謙在上半場射入關鍵一球,擊敗傑志奪得冠軍。今場比賽焦點落在林嘉緯、盧均宜身上,二人都是近年家傳戶曉的本地球員,並曾攜手效力傑志,贏盡所有本地賽事冠軍,球迷亦在比賽10及12分鐘拍手致意。