立即捐款
【獨媒報導】居住宏仁閣18樓李生上周五（5月23日），與哥哥再回到陪伴自己40多年的家，無可奈何當作「人生最後一場世界盃決賽」。李生本身是多年港隊「die-hard」球迷，自言人生最重要是媽媽、太太及足球，惟半年內先後經歷港隊失落亞洲盃決賽周資格、屋企大火及媽媽離世。他稱：「咁唔代表我放棄我嘅人生，我覺得宏福苑嘅街坊、大埔人好tough，佢哋幾咁唔開心都生活緊，見我哋燒咗層樓都返工啦。」
李生雖然對去年11月19日對新加坡的賽果感到失望，但仍沒有改變對港隊的愛，正如大火後的宏福苑一樣，「就算香港隊踢到幾差，宏福苑有幾爛，都係我嘅香港隊，都係我嘅屋企」。不過，41年前在宏福苑萌生的「港隊踢世界盃夢」，他則坦言「等於我返到宏福苑重建個機會難啲，定香港踢到世界盃都難啲呢？我都唔識答，好似似乎兩個問題都係infinity嘅」。
李生最喜歡的球員是尹志強及簡東拿，回家後在家中揮動簡東拿旗幟。
今趟回家當作「人生最後一場世界盃決賽」
（獨媒報導）第二輪上樓日已過去了一半，越來越多宏福苑居民繼續透過家中的窗口發聲。有人在窗口貼上由入伙到火災到上樓的日期、有人貼上「我❤️宏福 我要回遷」、有人綁上則黑白色絲帶。住宏仁閣高層的施小姐則在上樓前夕，特意到文具店買親手顏色筆和畫簿，手繪6個心心圖案和「宏福」二字，圖畫色彩繽紛，但其中一個心心笑中有淚。
施小姐在第二次上樓執拾時，將這些畫作貼在家中窗口。她說她很愛自己的家，憶述以前能從窗口看到雙彩虹和日落的景色：「夏天同冬天各有不同，但同樣都係靚到犯規！諗住佢會陪伴住我一世，無論去到天涯海角，喺出面幾唔開心都好，一見到呢個咁靚嘅風景，乜嘢情緒都冇晒！」
【獨媒報導】大埔宏福苑七幢受災大廈今日（5月25日）繼續開放居民上樓執拾。年屆七十的宏福苑第一代入伙業主劉先生，在宏福苑擁有兩個單位，他今日到宏昌閣的高層單位執拾。他與兒子一同到場，不過卻未有打算上樓，指自己年紀大，體力不繼「知道唔係幾適合上去啦」。
劉先生向記者憶述火災當日逃生經過，自覺幸運：「執返條命仔嘅，算係咁，阿彌陀佛啦，感恩 。」他因吸入大量濃煙，一氧化碳中毒，需留院一個月。
嘆業主只能「各自各執生」
面對家園被毀，他表示無言，嘆災後業主只能「各自各執生」，「無嘢好講啦！都冇咗啦個家園，點啫？奈何咩 ？希望妥善照顧下我哋啲業主！好簡單。」被問到會否對單位感不捨，他激動表示感到十分無奈，無可奈何，「奈何啫，捨得又係咁！唔捨得又係咁！好無奈呀！宜家希望以後嘅生活點樣，妥善安排我哋得啦！」
由20樓逃至4樓力竭 勸子先走「消防遲一個鐘我都bye bye」
【獨媒報導】宏福苑居民第二輪上樓執拾，宏建閣2701室住戶李先生一家四口與母親上樓。他指取回大約30袋物品，包括玩具、具紀念價值的相片和重要文件﹐家人回家後亦情緒激動，不禁流淚。他又表示不滿政府的「樓換樓」方案，實際上並沒有選擇：「我覺得就好似四餸一湯煮好晒俾你啦，你唔啱食你都要食！但係我食齋喎，一巴冚埋嚟！你食咩齋？你繼續要食啲嘢！」他認為自己是被逼作決定，「咁逼我哋揀啫嘛，咁就係叫做你情我願咩？」
家人回家後淚流 對未來感不安
對於有可能是最後一次上樓，李先生今次特意攜同兩名子女回家，與舊居道別，並指家人在回到單位時情緒激動，傷感流淚：「小朋友、媽媽都喊囉，始終咁多年！咁個細路仔都住咗12年啦、一個住咗8年，一下子乜嘢都冇晒！」李先生和8歲的兒子向《獨媒》表示，父親在大火之前已經離世，但家中仍有很多與父親相處的珍貴回憶。他指父親見證兒子出生，之後亦一直照顧他，惟最終無法從單位中搬走父親生前買的傢俬。其兒子就表示，回到單位時有與已離世的爺爺傷感道別，並說：「走啦爺爺………唔好留喺到啦，走啦爺爺……」他指對屋企感到十分不捨，「每個部分都唔捨得」，今次上樓帶走心愛的玩具巴士模型，以及爺爺送的禮物。
【獨媒報導】宏福苑七棟受災大廈居民今日繼續上樓執拾，居住在宏昌閣的Calvin帶同太陽花，悼念在大火中不幸離世的母親。此外，Calvin在其左手手臂紋上「宏福」字樣的紋身，並附有大火當日日期「2025.11.26」，以及蓮花和魚的圖案，用作紀念母親，「依一日係我媽走嗰日」。
Calvin接受記者訪問時表示，不肯定母親遺體的位置，但相信媽媽在房間內的床上被發現，所以在房間內放下花束。
在大火後，Calvin在左手手臂紋身，紋身印有大火當日日期，即「2025.11.26」，以及蓮花和魚的圖案，下面印有「宏福」二字。Calvin指紋身是用作紀念母親，「依一日係我媽走嗰日」，當中「宏福」的「福」字倒轉，因為仍然希望福到：「已經發生咗件事嘅時候，希望日後move on嘅時候會good luck。」
【獨媒報導】宏福苑發生五級火後，政府提出長遠安置方案，居民需要在6月30日前決定是否出售業權。居住在宏泰閣的廖先生再次上樓，他就對政府將捐款用作收購居民業權「有微言」，指去年12月初有報道指神秘男子四出收購宏福苑業權以獲取賠償，政府當時曾點名譴責。廖先生認為，政府如今以捐款用作收購業權，手法是更「高明」：「即係嗰個神秘男子，至少係用自己嘅資金，政府今次就係攞咗好多善長人翁嘅錢，走去買宏福苑業權。」
廖先生居住在宏泰閣，其單位內部沒有被大火焚燒，但家中物品被燒至熏黑，玻璃窗亦爆裂。他在首次上樓時已帶走最貴重、最希望取回的物品，今次主要是希望能夠帶同9歲的女兒一起上樓。
攜9歲女兒上樓 大火後一直解釋事情來龍去脈
他表示女兒一直希望再次回家，在對上一次上樓了解單位情況後，認為環境安全，適合女兒上樓，便讓她與單位道別：「咁小朋友其實一直都想番屋企望吓，咁所以今次又會帶埋佢上去睇下，俾佢同自己同屋企say goodbye。」不過，廖先生指女兒有少許緊張和害怕，但也十分生性，「佢會話有媽媽爸爸陪住，咁就ok。」
【獨媒報導】居於宏昌閣低層的陳氏姐妹今日與親屬一同穿上印有「原址重建」的白衣上樓，表示堅拒向政府出售業權。她們上樓後在家中窗前懸掛多幅海報橫額，包括「感謝中央政府」、「南無阿彌陀佛」、「原址重建」、「爸媽永遠♥︎你」等。記者早上從地下觀察，望上單位，聽到張貼橫額前，單位內曾傳出爭執聲。
妹妹上樓後解釋，張貼海報時警員「睇得緊」，是因怕她失足墮樓，最後警員有從旁協助。她指自己一度誤以為不可以張貼而情緒激動，最後她們成功懸掛海報橫額。
不過記者下午再到場觀察，已不見「感謝中央政府」的橫額，妹妹表示沒有特別補充，自己只簡單表達心意，「其他嘢已經理唔到」。
【獨媒報導】大埔宏福苑宏建閣、宏昌閣居民今日第二輪回家收拾，居住宏昌閣低層的陳氏姐妹與親屬一同穿上印有「原址重建」、「I❤️WFC」、「回家」、「宏福苑」字眼和「毛毛蟲攀爬架」圖案的白色上衣上樓。姐姐陳小姐強調不會出售業權，多次指希望原址重建，她相信比起四處張羅十個屋苑供災民「樓換樓」，原址重建的方案更能解決災民的安置問題：「其實你都要解決㗎啦，好過你周圍搵啲地方俾我哋左揀右揀，唔係我哋想要嘅樓囉，喺俾我哋嗰啲選擇嗰10個屋苑，我只可以咁答你哋，所以我要原址囉，我哋要原址！」
不滿無原址重建選項
【獨媒報導】宏福苑宏盛閣的張小朋友，去年11月25日剛度過7歲生日，屋苑翌日便發生五級火警。他直到今日（5月23日）才再次回家，取回生日禮物和心愛玩具、參加活動的獎牌。
張小朋友純真說：「好想 stay 宏福苑，但無辦法。」張爸爸表示「政府好好，安排晒所有plan畀我哋ABC⋯⋯但我哋想要其他Option。」他重申不少居民望原址重建，「真心希望有個平台畀居民表達自己意見。」
張小朋友就讀大埔浸信會公立學校，就正在宏福苑旁邊。他憶述當日放學後回到屋苑，在樓下目擊大火，「嫲嫲即刻帶我返佢屋企。」嫲嫲的家鄰近宏福苑，他搬椅子到窗邊，一直留意火勢發展。
今年四月，張小朋友的父母上樓，他與姊姊也希望同行，不過社工不建議家長帶年幼小孩上樓，至今日張小朋友才在大火後首次回家。
張小朋友取回的物品
【獨媒報導】居於宏仁閣的溫先生今日上樓，提及業主大會問題。他指法團理應根據法例召開業主大會，「呢啲係嗰個法律嚟㗎嘛，唔需要多講囉。」他無奈指居民已經盡力爭取，但如果最後仍無法召開業主大會，亦「無話可說」，「我哋只係平民嚟㗎嘛」，「咁我哋仲可以做到咩，咁我唯有聽天由命囉。政府想做啲乜嘢嘅我哋都管唔到。」
溫先生認為，業主大會可討論居民的安置方案和出路。居民出售業權後，將各散東西，「咁已經散晒啦，咁仲可以可唔可以發言呢 ？仲可唔可以仲有權去再講嘢呢 ？」
他明言，居民和死者都需要一個道歉，「死者要一個公平嘅合理嘅道歉，咁有冇呢 ？」溫先生稱，重點不在於是否承認事件屬人為，「其實而家開咗個聽證會啦 ，咁你個政府你覺得有啲咩人係做錯呢 ？如果係成班都人冇做錯嘅，咁咪唔需要道歉囉，咁唔需要道歉咁即係呢班人枉死囉，好簡單嘅啫，咁你認為冇人錯嘅，咁咪枉死囉！」「如果唔承認嘅、係意外嘅，咁冇嘢講囉。」
對於安置，溫先生稱目前選擇不足，「樓換樓」方案需要經過抽籤，亦需額外補錢。此外，宏福苑居民多已上年紀，難再供樓。他促增加賠償金額，讓居民在自由市場解決問題。
